絲絲講場：馬斯克搞神秘學校教「大人嘢」

玩角色扮演 探討倫理

呢間可以話係世界上最神秘嘅學校，冇官網冇任何社交帳號，建校四年來外界知嘅資料近乎零。近日終於有人爆料話，呢間學校只得31個學生，仲話入面教嘅係「大人嘢」！

話說XPRIZE基金會主席，去完Ad Astra參觀後分享話，學校會畀班細路透過現實情景同角色扮演去探討倫理道德。

有個題目係，有個湖邊小鎮，入面大部分人都喺鎮上唯一嘅工廠做嘢，但間工廠啲污染物又殺死晒湖入面嘅生物，究竟關唔關咗間廠好？嗱，呢班幾歲人仔就係要諗啲咁現實又複雜嘅問題，閣下都未必答得出。

咁另類嘅教學，當然有原因。話說馬斯克細時喺學校被人欺凌搞到入醫院，所以佢決心唔畀仔女讀傳統學校，仲索性自己搞咗間學校，主要係畀自己五個仔女同旗下SpaceX員工嘅仔女讀，學校入面唔會有既定教學模式同課程。

余絲韻