Market Insight:出口股係時候短炒

港股剛先破十月橫行區高位阻力28,798點,日日keep住過千億成交,必然唔會咁快放生淡友,昨日恒指回吐即日完成,埋單再挾多229點報29,137點。今浪好友似乎不到三萬不心息,淡友睇路喇!

偉易達發力追落後

「侵侵」爆冷勝選啱啱一周年,一年前選舉,「侵侵」對中國連珠炮發,估唔到一年後,與國家主席同遊故宮,仲鬼咁高興話永遠不會忘記此行。是否因應朝鮮半島局勢,有求於中國先送高帽,抑或「侵侵」由衷而發?古勝唔知,但幾可肯定,中美貿易戰開打的風險大大減低。

中美貿易戰應可大步檻過,創科實業(00669)及偉易達(00303)等出口股,短期可睇高一線。創科今年股價升唔停,相比下,值得留意隻落後的偉易達,昨日收市後出成績表,半年賺1.036億美元,按年升45.1%,預計電訊產品下半年銷售會繼續回升,承包生產服務亦繼續向好。

今年美國消費氣氛唔錯,嚟緊美國感恩節及聖誕零售數字好的話,唔排除偉易達可以升穿六月高位123.8元,趁業績拗腰回升,短期衝上130元樓上。

股王騰訊點石成金

講開中美關係,古勝就舉個大國崛起的最佳佐證。年初掛牌就不斷插水,仲未搵到賺錢方程式的Snapchat母公司Snap,周三晚出第三季業績,再一次令華爾街班股民失望,但公司今次醒,同日披露騰訊(00700)透過市場掃入咗1.46億股Snap的不具投票權股份,相當總股本的12%。消息一出,Snap股價在場外交易,一度由急跌兩成二,去到倒升兩成七。

當Facebook、Google及Twitter等美國科網公司,恨進入中國市場恨到流晒口水,轉過頭中概網股靠財雄勢大,經已掉轉頭搶灘美國。

事件中見到騰訊點石成金嘅威力,又何止一隻閱文集團(00772)?照咁睇,集資額奀過閱文的另一騰訊概念股易鑫(02858),下周四掛牌唔癲就有鬼。

散戶應遠離「私人派對」

內險股連同騰訊成升市火車頭,美國傳蘋果公司會推無邊及面容識別iPad,蘋果概念股又再炒上,舜宇光學(02382)升6.9%創新高。

廣州國際車展開幕在即,車股繼續有北水捧場,吉利汽車(00175)回一日又升過,收報26.2元升0.7%。吉汽新款SUV S1會在車展開賣,街外消息吹得好勁,下星期預訂訂單數字可能刺激股價衝多浸。

一六年全配售上市的利寶閣(08102)上個月尾發盈喜,昨日突然大插,股價由開市第一口價5.98元落到最低0.54元,彈番上0.9元收市,跌咗85%。

一四年業績至醒都係賺千幾萬的酒樓,未出事前,唔識仲以為佢會印銀紙,呢類私人派對大插水後幾日,通常最多散戶走去撈底博反彈,古勝唯一的建議係:「千祈咪」。

古勝