說到失敗的投資，曾錦安打趣道：「嫌自己唔夠風流，太過專一，所以錯失另類投資機會。」他稱：「九十年代，香港有好多男人北上包二奶，稍為有啲錢嘅男人會喺內地買樓，畀二奶住，有部分人甚至有幾個二奶。當時深圳一個二千呎大宅，作價約一百二十萬元人民幣，啲人當然唔會咁笨，單位會寫自己名。隨住時間過去，同二奶分晒手，但當地樓價癲升，一個二千呎單位以二千萬元人民幣沽出，就可大幅獲利離場。我後悔冇包二奶，否則可以賺大錢！」
三十年前的股災曾令曾錦安大蝕十多萬元，但他認為一七年不會有股災發生的可能，只會出現震倉，因為大部分散戶暫未瘋狂入市，目前發生股災的風險不大。
他稱：「以前嘅股災都係股市上升一段時間後，散戶趕入市，驚買不到貨，但現今散戶已非常理性，對投資有戒心，故大戶唔會再喺現時出手，直至平時唔買開股票嘅小市民，都開始跟風入市，覺得股票好炒，人入佢又入時，到時就會係股災出現嘅先兆！」