絲絲講場：ASM生產靠晒機械人
何止AI，仲有機械人。ASM太平洋（00522）行政總裁李偉光話，集團大部分加工及裝配程序將交畀機械人，期望部分車間可無人化。
佢哋惠州、龍崗廠房今年已大量引入咗機械人，馬來西亞廠亦搞緊，主要用於加工，裝配方面亦開始用。佢話公司未來三年會投入可觀資金，打算將大部分加工程序改由全機械人處理，減省人工成本兼慳番唔使開燈。
頭9個月賺23億
唔只咁，佢話提升工廠自動化過程中亦會涉及人工智能（AI），加上物聯網未來發展空間大，所以AI亦係佢哋未來幾年嘅投資重點。
睇番佢哋業績，今年頭九個月盈利23.4億元，年增1.2倍。
李偉光就話，公司計劃喺下次股東大會之前回購總值7.8億元股份，而截至九月底止，佢哋已經動用咗2,400萬元，但由於聯交所對公司回購有限制，所以到時未動用到嘅資金會考慮用作派特別息。
余絲韻