絲絲講場：雷蛇萬聖節記招發青光

三頭蛇Logo 粉絲紋上身

電競商雷蛇（Razer，01337）尋日舉行招股記者會，會場用上佢哋公司黑加螢光綠嘅標誌性配色，照到在場所有人同物都發出綠光，撞正萬聖節，你都咪話唔詭異。

玩燈光玩到咁，可能同公司嘅花名「燈廠」有關，事關佢哋啲產品大部分都有一個特點，就係配有絢麗嘅燈光，配合埋程式，你想佢點閃就點閃，甚至彩虹都整得出。

相信打開機嘅都知道，雷蛇仲有個型格三頭蛇Logo，創辦人兼主席陳民亮就晒，隨便上網搵都會見到唔少粉絲愛到將佢哋個三頭蛇Logo紋上身！

伺機收購 發展影音娛樂

業務方面，陳民亮話未來將發展影院及音樂等娛樂產業。佢哋去年收購咗美國導演佐治魯卡斯（George Lucas）創立嘅影音系統設備公司THX Ltd.，未來亦會留意其他收購機會，包括人才、知識產權及技術，目標盈利表現係其次咁話。

陳民亮話，公司現時收入來自歐、美及內地，各約佔三成，仲會進軍手機市場，好快會推新手機及手機遊戲平台。

幾時扭虧為盈先？財務總監曾辰裕話好轉緊，但冇講扭虧時間表。

又未至愛到要紋上身，純粹想抽番手？雷蛇今日開始招股，十三日主板上市，招股價介乎每股2.93至4元，入場費約4,040.3元。

余絲韻