Market Insight：比亞迪有國策明撐

新能源汽車股比亞迪（01211）第三季盈利倒退24%，並預期全年盈利最多跌20%，昨日跌2.3%。古勝比較有興趣知道係，早前將比亞迪目標調升至100元的投行摩通點講。

新能源車銷情看俏

摩通話，受補貼減少影響，比亞迪第三季度純利僅及預測指引範圍內的較低水平，惟第四季度指引顯示新能源汽車銷售將會有所改善，以及手機零件相關業務保持穩固增長，而軌道交通部亦開始帶來貢獻，故該行維持預測比亞迪一九年的汽車銷售量將較現水平翻一番的看法，建議趁低收集，目標價維持100元。

在下就覺得，其實Tesla在華設廠，不見得會對比亞迪構成威脅，畢竟內地市場龐大，電動車作為中國自我掌握的新汽車制式，愈多海內外廠商參與完善技術、售後、充電等設施，餅愈做愈大就愈好，更何況針對電動車行業發展，內地政策擺到明支持內地企業，而比亞迪更是行業龍頭。

本欄上周都提過，等比亞迪跌勢喘定再行事，圖表顯示63至65元水平乃一支持區，昨日落到該水平果然有反彈。中長線可分三注行事，短期確認守穩63至65元支持，可考慮先落首注。

靠新經濟發掘財路

閱文集團（00772）認購反應熱列，騰訊控股（00700）股價一度升過上353元，收報349.6元，升0.52%。看來閱文上市前後，騰訊股價仍會反覆衝頂。今年芬佬揸騰訊贏到開巷，基本上末季可以翹埋雙手唔做嘢。不過，若然呢浪股價穿唔到頂，或者會有人提早收割鎖定利潤等過年都未定，故要提防好淡爭持會轉趨明顯。

適應投資市場變化

今年在投資市場贏大錢，一係揸實騰訊，一係炒比特幣（Bitcoin）。近日比特幣價格便再破頂，昨日執筆時傳來高位見6,314美元。

雖不斷被傳統投資人質疑係泡沫、係騙局，又受到各地政府打壓，偏偏就打不死，仲愈來愈多國際市場上的交易接納以比特幣作為交易代幣。

呢個現象，頭腦轉唔過嚟的古老石山只能望門興嘆，繼續咒罵遲早會爆煲之類；能夠擴闊吓視野，睇多啲了解多啲新經濟發展，即使未有足夠信心落場投資，但都會明白多啲眼前投資市場現象到底發生緊咩事。

雷蛇勝在飲頭啖湯

除咗閱文之外，電競公司雷蛇（01337）將於周三開始招股，十一月十三日掛牌，相信又會成為市場焦點。

所謂「電競」，乃參與者透過電腦進行競賽，能夠喺主板掛牌，咪誤會係靠打機發達，準確啲講係靠經營打機專用的配件市場，如電子遊戲相關的軟、硬件及服務等獲利。有數據顯示，一六年內地的電競市場規模已超過500億元人仔，今年電競用戶將增至逾2億個，呢啲就係芬佬捧場的原因。

當然呢個世界冇得玩電競唔會死，充其量都只係娛樂消閒一類，但加上「電子」概念，冠個「新經濟」帽子，估值可以天咁高，說完全沒有泡沫？非也！只是投機炒概念當然係熱辣辣時跟炒，照計市場上的第一隻應該可以享有較高估值。

古勝