絲絲講場：國貨美的市值撼贏Sony

擁有49年歷史、於內地以生產白色家電為主嘅美的集團（000333.SZ）總市值，已超越成立逾70年嘅日本跨國企業Sony（索尼）！美的現時市值約500億美元（約3,900億港元），Sony得475億美元（約3,705億港元）。

美的累升80% 跑贏全球同行

深圳上市嘅美的，股價今年來累漲逾80%，可以話係全球家電股中升幅最強，近年靠智能家電上位。就睇佢尋日公布嘅業績，今年頭三季營業收入約1,869億元人仔，年增逾六成，淨賺近150億元人仔，年增逾17%！

美的六八年成立，為全球500強企業之一，中國企業500強第32位，係白色家電業龍頭，近年做埋房地產與物流。

至於Sony就成立於四六年，以研製電子產品為主業。七九年佢哋推出Walkman打響名堂，改變世界，搞到全球要統一跟用「Walkman」呢個唔標準嘅「日式英文」！Sony自九四年起推出嘅各個PlayStation系列，試問有邊個資深機迷唔識？

幾咁輝煌……嘅歷史囉。隨住Apple產品冒起，Walkman變古董，電子遊戲機亦難擋智能手機嘅衝擊。近年閣下仲噏得出Sony出過啲咩令人好有印象嘅呢？

余絲韻