Market Insight：三農概念股啱短炒

美國參議院通過財政預算，華爾街當正係特朗普稅改計劃可以順利過關。上周五道指再升165點，以歷史高位23,328點收市。迷信十月股災月的悲觀者，恐怕要錯過十年難逢一潤的完美升浪。

之前人行預告明年降準，只要內銀達到普惠金融標準，明年最多可降準1.5個百分點。普惠金融簡單講，就係大銀行唔多願招呼的弱勢社群，包括小微企業、農村及貧苦學生的助學貸款等等，針對不同階層的破天荒降準能否收效？有待時間證明，不過，早兩星期教育股沾上多少政策好處，都借機會炒過一輪，咁三農概念股應該遲早炒番一兩轉先交到差。

上周五隻中化化肥（00297）股價創逾兩年高，勁升17.7%，有消息指中化集團準備分拆旗下石油業務來港上市，市場憧憬中化系有資產重組，包括出售鹽湖股份的可能。不過，計番市值同資產置換規模，就算成事，營運向來麻麻的中化肥都差唔多到價，高追風險同回報唔多對稱，上到1.8元樓上再追吸引力一般。

閱文當博個抽獎運

上周五港股反彈328點收報28,487點，夜期升30點，加埋美股高收，睇怕今日恒指裂口開高機會相當大，如果返回10日線28,489點及上周初橫行區底部28,620點之上，整個震倉活動可以話以閃電速度完成，後市唔可以睇太淡。

閱文集團未上市先哄動，要揸到市值近9,000萬元的騰訊（00700）先確保認購到一手閱文，咪玩喇！對騰訊小股東，都要揸1,256股先認到一股，認番嚟隨時沽碎股連息都蝕埋。即使再睇好，都不如入白表玩吓大抽獎，賭吓係咪時運高。有報道話，鑑於市場反應，閱文可能提高集資額去到10億美元。

見上周五隻FinTech概念半新股眾安在綫（06060）隊穿80元，補咗掛牌第五日留低的裂口後，走勢有轉強迹象，若然覺得大抽獎唔啱玩，都不妨留意吓佢。

中建材發力追落後

古勝叫大家留意水泥股，話口未完上周五經已即時爆升，華潤水泥（01313）出盈喜，預告首三季純利升2.15倍至26億元。

潤泥有重估價值

搵番往績，拆番開三季，首季賺6.04億元，第二、三季都分別賺逾10億元，在供求側改革下中小型廠陸續被淘汰，大廠強者愈強，潤泥大為得益。近日內地水泥價格受季節性幫助可能升穿年中高位，第四季業績被重估，相信機會好大。

龍頭海螺水泥（00914）及潤泥上周五各升5.5%，走漏眼合併中的中材股份（01893）及中建材（03323）由頭升到尾，埋單升11.1%及10.9%， 相比海螺及潤泥，中建材是幾隻水泥股中對水泥價格敏感度最高一員。1股換0.85股中建材關係，中材當然都齊齊落鑊。

計賺錢能力，當然係海螺、潤泥秤高，不過炒股票似藝術成分高過科學計算，尤其成個市都追住落後股掟錢落去，論到市帳率折讓，0.73倍市帳率的中建材，在水泥板塊中算大落後的一員。

古勝