絲絲講場：孫正義6萬億重注機械人
日本軟銀集團喺今年五月宣布推出全球最大科技基金Vision Fund之後，軟銀創辦人兼行政總裁孫正義接受日本傳媒訪問時就豪言，Vision Fund只係第一步，正計劃透過擴大Vision Fund嘅規模，喺未來十年，投資總數8,800億美元（約6.86萬億港元）喺1,000間科技公司！嘩！咁樣同豪賭有乜分別？
搞多幾個Vision Fund
孫正義指，集資額高達1,000億美元嘅Vision Fund根本就唔夠用，擬每隔兩至三年就成立第二、三及四個Vision Fund。
佢仲透露，軟銀計劃投資嘅科技公司，主要係包括涉及人工智能（AI）和機械人技術領域嘅公司。
事實上，孫正義對機械人前景一向都最睇好，好似佢自家研發嘅日本服務業機械人Pepper，家陣就喺旗下軟銀全線手機舖擔當服務員。
「金屬領」數目看齊人類
佢預測，三十年之後，地球上有感知能力嘅機械人嘅數目將會同人類睇齊，而呢啲機械人將從根本上改變勞動力市場。而佢就特別稱呼呢啲機械人做「金屬領」工人，與人類社會嘅藍領同白領工人並駕齊驅。
講番目前嘅Vision Fund，背後其他投資者仲包括阿布扎比嘅穆巴達拉投資公司、蘋果公司（Apple Inc.）、高通、富士康同日本聲寶公司等等，全部都非泛泛之輩！
余絲韻