Market Insight:水泥股揀大唔揀細

港匯變動唔大,個市昨日跌得突然,卻唔覺資金大規模撤出的蹤影。資金輪動,股市虛完又實,昨日水泥股表現就唔錯。十九大之後,供給側改革及增加基建投放等國策大方向延續,尤其高污染的水泥行業,繼續淘汰中小型廠的老舊產能,行業趨向更為集中的好處,對大企業的好處會日漸浮現。

海螺攻守兼備

八月至今華南水泥價格持續加價,內地業界估計九至十一月傳統旺季需求帶動下,加上入冬後北方地區減排要求下,需要大範圍停產,供不應求情況更嚴重,水泥價格破上半年高位只是遲早問題。

龍頭股海螺水泥(00914)上半年業績已翻一番,賺67.3億元人仔。街外估緊,第四季水泥價格如果可以回到第二季高峰水平,全年賺130億元人仔問題唔大。

現價計市盈率11.2倍,同一○年以來平均17倍PE有段距離,即使一八年同一九年業績好難再有今年谷底反彈的戲劇性增長,但返回13、14倍PE,已講緊近兩成升幅,現價海螺是進可攻退可守之選。

恒指估值相對便宜

真係有啲嘢!喺八七股災三十周年之日,港股個市食完晏返嚟失驚無神勁插超過六百點,莫非連升九個月,魚缸通街贏家,敵不動、我不動;敵欲動、我先動!有胡齊齊食,結果搞到人踩人?

升得多未必跌得甘

三十年前的十月十九日,華爾街股市拖累港股大冧檔,翌日港股宣布停市四日,未能阻止恐慌之餘,反而引發復市追瀉,年紀有番咁上下的股民,應該有多少印象。

今年港股累積升兩成八,在全球市場名列前茅,不過,升得多同跌市唔係可以簡單咁混為一談。古勝早兩日都講過,在亞洲多個股市都創本世紀新高之下,港股卻同○七年直通車高位三萬二點仲有一段距離。

論估值,恒指平均市盈率14倍(國指更低得9.3倍),同以往20倍樓上先算貴,同要相對審慎的認知有段距離。在亞洲股市中,也幾乎是最便宜市場,只有新加坡富時指數11.5倍比佢低。

中興調整一步到位

昨日股災翻版講到似層層,無疑是危言聳聽,年初恒指由22,000點起步累積升幅唔細,通街港股基金贏到開巷,部分審慎芬佬唔想磨爛蓆,趁十九大計數亦唔出奇。

升得高跌得快,昨日個別大媽愛股都跌得幾傷,話口未完,盈喜後中興通訊(00763)跌穿10日線,遇啱大跌市兼有大行唱衰話市場對5G期望過大,股價調整一步到位,昨最低見25.8元,收市跌11.3%報26.15元。同樣炒5G概念的長飛光纖(06869)都要隊埋一份,跌7.7%。

有傳蘋果公司iPhone 8銷售唔及預期,向供應商cut單,手機相關股齊插水,信利國際(00732)昨跌7.2%,高偉電子(01415)跌4%,瑞聲科技(02018)跌2.8%,舜宇光學(02382)則跌1.2%,睇嚟5G概念股及手機設備股短期要停低抖抖。

古勝