絲絲講場：華訊太子女代父Sell殺菌機
華訊（00833）主席林賢奇早前預告會喺尋日舉行嘅香港秋季電子展公開新產品，但尋日現場就唔見林主席嘅身影，靠晒千金兼公司投資者關係經理林藹欣（Ivy）撐場。
原來林主席同公子林子泰去咗睇江西宜春廠房開幕，但因為飛機延誤返唔切香港，唔可以如期現身會場。不過，人唔到，新產品都要照推，其中有款光化學空氣殺菌除味機，聽聞已經多年研究兼攞埋專利，能快速殺滅細菌病毒。
Ivy就係呢款新產品嘅用家之一，仲話屋企共有5部唔同牌子嘅同類產品，依家自己睡房試用咗新產品後，打算要多部幫小朋友換埋齊齊抗菌。佢仲話，林主席都想在內地學校方面幫到更多小朋友，不過家陣公司仲篩選緊適合嘅代理商。成事嘅話，對內地小朋友又好，對華訊又好，相信都係一大喜訊！
余絲韻