承接周三的話題，大市係咪見咗頂？因包括內房、本地地產、蘋果概念股以至5G等板塊都出現散水迹象，我答案係肯定未！
前文出街當日，恒指又再挑戰過大時代最高位28,588點，但無功而還。有時我會諗，市底係強啫，但假如恒指三次上試28,588點不果，後市又會是個怎樣的光景呢？不會的，我諗多咗啫，內地於十九大前正路有維穩，歐洲加泰羅尼亞的假獨立為憂慮降溫，美股三大指數於周三又全部破頂。
再睇市寬，目前超過七成於紐約主板掛牌的股份都企穩200日線的分水嶺，該比率創過去半年來新高。橫睇豎睇，我都睇唔到港股有看淡誘因。
好多人唔明騰訊（00700）股價點解企於350蚊成個禮拜唔多郁？有傳中央政府正尋求入股騰訊，咁都唔升？但其實這並非利好因素！當局有鑑於此前集團對視像平台的監管疏忽，才借入股同派員來插手集團營運。此舉長遠可能削弱集團營運自主性同吸金能力。
不過，隨着集團於內地經濟的影響力日益擴大，市場對微信同視頻平台有審查一早已經妥協啦，不會拖累到股價喇。
騰訊股價於近日無大進展，但348.4元的上月阻力破了，後市走勢仍向好。市傳從集團分拆的閱文集團正進行上市聆訊，不排除於閱文的招股明細同騰訊股東的保證配額出台時，副引擎就會撻番着啦！
富昌金融研究部總監 譚朗蔚（作者為註冊持牌人士，持有騰訊）