Market Insight：內地券商股現價值博

佣金收入穩步復甦

資金輪流炒，昨日內險股幾乎全線炒起，要搵落後板塊，古勝認為非幾隻內地券商股莫屬。滬綜指由3,000點邊起步，唔經唔覺已走到貼近3,400點關口，券商季度收入啱啱放榜，第三季實現佣金244億元人仔，差不多等於上半年佣金總收入的六成一，叫做承接到上半年穩步復甦的勢頭。

近排A股成交旺番唔少，第四季佣金收入再比第三季有改善的機會相當大。HTSC（華泰證券）（06886）、中國銀河證券（06881）、海通證券（06837）、招商證券（06099）、光大證券（06178）同埋中信證券（06030）走勢都悶咗一排，唔怕坐貨，依家個價買落去博佢下一輪爆升，應該係贏面大輸面細的入貨時機。

黃金機會咪錯過

「侵侵」進駐咗白宮大半年，政策走數多、建樹少。不過，華爾街班賓架都唔理「侵侵」即將呈上國會的稅改方案過唔過到關，更無視聯儲局縮表甚至再加息的可能，美股升唔停。股市集體樂觀情緒更唔係美國獨有，事實上，日股啱啱創廿一年高位，南韓股市都係廿年來最高，港股攻破28,588點之後，下一個目標必然係差不多十年前，因為無開出的港股直通車所創下的31,958點歷史高位。

毫無疑問，中國經濟有見底迹象，這從出口及PMI數據以至央企首三季盈利增幅可感受一二。A股明年加入MSCI，激發更多國際資金調配，已係公開秘密。雖然巴菲特講過別人貪婪要恐懼，但有時過分杞人憂天，亦可能錯過幾年才一遇的黃金機會。

古勝主觀睇法，以依家掹車邊先去到千億元的成交額，同○七年及一五年股市狂熱相比，個市未有耐熱到爆煲，先天下之憂而憂的懼高股民，見到有日大市成交衝到千幾二千億至開始驚都未遲。

比亞迪隨時變「紅底」

炒股唔炒市下，連跌三日的眾安在綫（06060）昨彈2.5%，在下估計下一次高潮會係MSCI季檢前夕。至於傳與寶馬組合營的長城汽車（02333）AH齊停，果然有料到。周三被質的華晨中國（01114）澄清與寶馬合營協議簽到二八年，仲有高盛護航話內地寶馬產品進入高增長期，會拉動華晨寶馬合營純利率表現，評級調升至買入，目標更由13.9元翻一番去到28.8元。

華晨昨反彈1.1%報21.5元，但同早市高位23元相比縮番一截，一來長汽合營細節有待確認，大孖沙唔多敢撈。

同時，另一邊廂，新能源汽車股又再落鑊，在內地電動車市場做得唔錯的北京汽車（01958）昨日升7.3%，而龍頭比亞迪股份（01211）亦上升2.2%，後者貼住條10日線行，唔穿真係有機會炒上去見90至100元。

古勝