絲絲講場：邢李（火原）9億元思捷股份轉畀女
思捷（00330）尋日喺聯交所嘅權益披露，比佢近年業績更有睇頭！權益披露顯示，思捷大股東名單多咗邢李（火原）大女邢嘉倩及二女邢愛林嘅名，二人持股合共約2.11億股，佔思捷股權10.97%。
原來係邢生喺十月九日將呢批股份由信託轉去一間叫Total Market嘅公司名下，而兩個愛女就各自持有嗰間公司50%權益，變相轉晒啲股份畀兩個女！絲絲計番，以思捷尋日收市每股4.27元計，呢批股份總值逾9億元。
思捷前揸弗人邢李（火原）○八年全面退出管理層。而佢在任時，思捷股價曾高見逾100元，佢亦喺○三年至一○年多次減持思捷股份，套現超過200億元。
余絲韻