Market Insight：實力紅籌股現強勢

上實突破有待確認

今個月聯儲局開始縮表，十二月更可能加多一次息，短期無乜利好消息，大市要拗腰突破昨日朝早高位唔易，想買貨不妨先忍一忍手等機會。

古勝留意到兩大紅籌北京控股（00392）及上海實業（00363）近期股價反覆向上，昨日更雙雙創下52周新高，北控曾高見45.85元，上實則高見25.35元。話時話，呢兩隻大型紅籌股，股價表現真係好少咁同步。不過，睇見其各自所屬的燃氣同內房類板塊又未有集體異動，咁係咪有資金要押注估值落後的大型紅籌股，就要繼續重點關注吓資金流變化。

走勢上，北控較大阻力在47至48元水平，若成功突破，目標可上移至52元，支持在42至43元；上實股價25元乃逾年阻力區，若今轉確認突破，目標試衝28至30元，回吐宜守24元。

個股升得高時跌得傷

兩星期前人行預告降準，可以話將「十九大」前的維穩行情推到高峰，在正式開會前，受調控影響的內房股，開始有高位散貨現象。隊得最狠有融創中國（01918）跌7.2%，奧園（03883）跌6.5%，中國恒大（03333）跌5.9%，世茂房地產（00813）跌4.1%。

5G概念股都有散水味道，龍頭股中興通訊（00763）跌8.1%，京信通信（02342）跌6.2%，總之全部一個隊字。

長城汽車（02333）都算係昨日少數逆市奇葩，經過近四個月橫行，忽然火燒冷灶狂抽14.3%，中段曾經創11.78元的超過兩年新高。一來啱啱出咗營運數據，九月份銷量靚仔，按年升4.5%乃七個月以來最大升幅，另有消息話德國寶馬同長汽傾緊成立合營公司，對估值低、股價大落後的長汽，刺激當然非同小可。

常言道多隻香爐多隻鬼，睇華晨中國（01114）昨日由升變跌，由朝早開波無耐23.25元，一直隊到落20.8元，高位唔見超過一成。消息雖仍有待證實，但升得咁上下的強勢股，一有風吹草動，殺傷力都唔講得笑。

醫藥板塊慢火煎

恒指同啱啱創的十年新高擦身而過，作勢做個雙頂，即使埋單計數恒指跌幅唔大，惟見近排當炒股份，紛紛有炒家鳥獸散迹象，睇嚟個市短期難免要停低抖抖氣。

古勝昨日提及的利邦（00891）再升14.5%，肯上車真係有位上。但當然，炒易主，一日交易未落實，都存在變數，短炒都仲係要執生，見好識收。此外，古勝喺上周三本欄見報叫大家留意的耐世特（01316），走勢亦對辦，昨日高位見過16元，乃52周新高，成交像樣，有貨一於坐定定。

此外，早兩日提過有政策消息的醫藥及相關器械股份，炒作正在升溫，見山東新華製藥（00719）昨升逾6%、康寧醫院（02120）升逾2%、復星醫藥（02196）升近1%、白雲山（00874）及麗珠醫藥（01513）升逾1%，慢火煎魚格，揀啱實力股，唔怕同佢鍊過。

古勝