孖妹S檔案：睇女神行頭 揀靚品牌股

喺尖沙咀街頭，真係見到好多Bling Bling嘅青春少艾。所謂人靠衣裝，真係講得一啲都無錯，靚人靚衫行出嚟果然無得輸，連走喺潮流尖端嘅孖妹都被迷倒呢！所以忍唔住搵嚟四位同我咁高咁大嘅美少女，睇吓各位女神身上着嘅衫係咩牌子，兼了解吓佢哋有冇炒消費股！

同各位美少女傾完偈，發現唔少潮流品牌受佢哋追捧，但究竟一眾國際品牌股業務同股價前景有幾掂？睇睇證券界從三大品牌類別嘅分析。

程小姐	做Finance嘅吳小姐	Erato

唔知品牌有冇上市

程小姐：「我着緊嘅係MPC上衣、Forever 21外套、戴緊嘅係Karen Walker太陽眼鏡，鞋係Millie，袋係Dior。所有衣物價錢共約兩至三千，但唔知呢啲品牌有冇上市。」

莊小姐	豐盛馮宏遠稱，對鞋類股份沒有甚麼期望，並相信行業只會賺得愈來愈少。	各大品牌股個別發展

果粉未揸Apple股票

做Finance嘅吳小姐：「我鍾意喺Zara同A&F買衫，亦係iPhone迷，曾經諗過買蘋果公司（Apple Inc.）股票，但最後都冇入到。反而，我係睇開建築股！」

愛跟網紅着衫扮靚

Erato及莊小姐：「我哋身上嘅服飾都係網購，見到邊個網紅着得靚，自己就會跟住買。」

運動品牌：Nike及Adidas

馮：豐盛金融資產管理部分析員 馮宏遠

網購打殘 利潤漸奀

Kitty：Nike（美股：NKE） 係一六年道指表現最差嘅股份，因佢最近一年北美銷量跌咗3%，北美銷量佔Nike總銷量超過四成，故就算內地銷量同年升咗9%，都唔足以彌補。Nike最近季度毛利率跌至43.7%。

美國有一排咪好興Athleisure，啲人鍾意着運動休閒服出街，但依家好似冇咁興喇。而且Nike仲要同掙扎求存嘅Under Armour（美股：UAA）及Adidas（美股：ADDDF）鬥，真係幾慘！

Adidas跌15%先好撈

彩兒：不過，你同我都仲着住Nike鞋！我信Nike唔會咁易死嘅。

記唔記得，美國總統特朗普上場冇幾耐，就宣布退出跨太平洋夥伴關係協定（TPP），佢仲好絕咁話要重新磋商貿易條約，將製造業職位帶返美國，嗰陣不知幾多人估Nike同Adidas將會冇運行。因呢兩間公司好多廠房都設喺美國以外嘅國家，例如越南，一旦要搬晒返美國，肯定令波鞋稅務成本大增，大幅削減盈利。但佢捱到依家，咪又係生存到？

Kitty：咁你又啱，憑住Nike嘅「Just Do It」精神同無限創意，又點難到佢？

馮：我對鞋類股份冇咩期望。美國網購愈嚟愈流行，連鞋類龍頭大佬Nike啱啱都被迫要妥協，畀Amazon直接攞貨。網購價一般會低過專門店嘅價，所以相信鞋類全行都只會賺得愈嚟愈少。行內比較，Adidas會相對好Nike少少，但若想買Adidas，穩陣起見，等股價跌10至15%先好撈。

另外，Adidas啱啱超越咗Nike嘅Jumpman 23 Michael Jordan系列銷量，成為美國運動鞋市佔率第二嘅品牌。而且過去兩年，Adidas股價彈咗逾1.4倍。至於業績方面，Adidas今年第二季度毛利增加0.7個百分點至50.1%；期內全球銷售增長19%，其中adidas品牌價值增長21%，旗下的Reebok品牌增長5%。

手機股：蘋果公司

現價買入 明春沽貨

彩兒：不如買即將推出嘅iPhone X，買嚟用又得，炒機又炒股亦得，得咗！蘋果公司（美股：AAPL）今年第三季收入454億美元，按年增長7%，業績睇落唔錯。

服務盈利增長續強

馮：蘋果公司主要營收係嚟自iPhone，逾10%係嚟自服務，但過去兩至三年，服務比硬件銷售所帶嚟嘅盈利增長更為明顯。眼見公司主要盈利適時由硬件銷售轉型至服務，料投資者會幾受落，始終服務收入先夠穩定。我估計，服務方面嘅盈利增長動力，喺未來一至兩年會繼續強勁，同App開發商嘅分成收入亦會進一步增加。

依家焦點係iPhone X，其AR功能或者有重大突破，畀投資者好多想像空間。只要iPhone X冇延遲出貨同埋OLED技術冇咩大問題，蘋果公司股價就有望炒上。我都係果粉，對佢嘅QC（質量控制）幾有信心，建議投資者依家至十一月前入市，然後持貨至明年第一季先沽。

奢侈品牌：LVMH及Prada(普拉達)

Euro跌歐股旺勢利好

Kitty：Nike同Adidas我哋都話熟啲，但講到名牌包包，聽得最多係LVMH、普拉達（01913），但其實連佢哋公司有冇上市，我都唔知。

LVMH有望多賺兩成

馮：當然有上啦！等我講多啲佢哋嘅嘢你知。首先，LVMH嘅PE得20幾倍，比起其他法國牌子，例如Hermès嘅PE低好多。LVMH唔單單賣包包，仲賣酒同化妝品等，因為佢其實係間綜合企業，時尚皮革商品貢獻嘅收入只佔總收入逾三成。集團零售業務佔比確唔少，但零售業務固定成本較大，不過只要銷售增長多啲啲，就足以帶嚟可觀盈利增長，料集團未來整體銷售增長會有12至15%，盈利增長就有逾20%。

另外，我估歐元會慢慢轉跌，對收入以歐元計價嘅奢侈品牌公司嚟講係好消息。我估歐股會繼續旺，有愈嚟愈多資金流入，呢啲奢侈品牌股股價再向上。

普拉達歐美業務倒退

彩兒：如果LVMH同普拉達二選一，買邊隻好？

馮：我建議LVMH。單睇過去兩年，環球經濟開始回穩，奢侈品牌包括LVMH嘅銷量開始多番，但普拉達嘅銷售增長明顯比同業差。普拉達推出嘅新產品款式一直唔夠吸引，憑佢嘅估值，某程度上亦反映公司出現問題。

普拉達啱啱發布今年中期業績，淨利潤為1.15億歐元，同比大跌18.45%。除亞太區市場收益錄得0.4%增長外，公司喺歐洲、美洲及日本嘅收入均見倒退。

Kitty：未到咁悲觀啩？我會唔捨得佢啲包包。

普拉達亞太區收益佔比最大，大中華區銷售回升，咁即係佢前景唔錯？加上普拉達不斷增強社交媒體宣傳，透過微信與中國客戶緊密互動，同時推出電子商務，擴大集團內所有品牌嘅網上銷售渠道。

馮：重點都係睇吓佢之後陸續推嘅新產品，會唔會令人眼前一亮喇！

彩兒 Kitty