Market Insight：電訊設備股起動

上周五美國九月就業數據出爐，本來預咗受颶風影響，非農職位增幅都唔會好睇，估計僅增7.5萬個，結果出嚟出乎意料咁差，減少3.3萬個，是七年來首次減少，認真趕客。

不過，近排華爾街對「侵侵」稅改寄予厚望，股市大好友們殺紅了眼，好壞消息統統少理，結果當晚道指只微跌1點收報22,773點，十年美債孳息兩個半月以來首次抽上2.4厘水平。

大市升勢有餘未盡

從利率期貨顯示，債商完全無放差勁就業數據於眼內，十二月聯儲局議息，加息四分之一厘去到1.25至1.5厘機會率，由數據前87.8%微升至89.2%。股市既唔驚縮表同加息，亦認為短期經濟數據波動，唔會改變聯儲局出手的決定，加息打風都打唔甩。

常言道股市眾地勿企，以為A股休戰，十月開局一定係悶（包括古勝自己），人行出其不意使出一招預告定向降準，港股即刻挾到爆，上周三個交易日恒指累升903點，上周五一度攻破28,588點大時代高位兼創近十年新高，收市有近900隻股票做好，整體氣氛顯示，大市升勢仲係有餘未盡。

貨乾的眾安在綫（06060）依然係炒家焦點，股價再挾16.5%收報93.65元，誇張係56億元成交仲多過股王騰訊（00700），連帶股東中國平安保險（02318）及百仕達（01168）都得益，有1.1%及4.1%進帳。上周五朝早去茶記食早餐，已經聽到隔籬枱班太太炒股團話眾安要睇一舊水，睇上周五一開經已85元，講緊一成七左右升幅，話多唔多。

暴動股要睇位落車

古勝之前已經講過，眾安市值大（主要係非流通內資股），上市發1.99億股H股出街，日本軟庫食咗頭啖湯，攞咗三成幾貨（半年禁售），扣埋配售期間承接的管理層及互惠基金股東，估計實際派出街1億股鬆啲，頭三日turn咗1.29億股，第四日經可以輕鬆井噴式爆發，反映已經相當乾身。

睇玩法，有啲似年初隻美圖公司（01357），一是貨乾，二是業績見紅，無PE大家索性唔使睇，呢類暴動股講到幾專家，乜目標價都假，純炒momentum，總之一見股價唔再上就要散檔，若果看官唔明，不妨自己睇番美圖三月中張走勢圖。

中通服可破5元關

對比之下，近排5G概念股就有慢火煎魚的態勢，隻中興通訊（00763）唔覺唔覺破埋30元大位，上周五最高見30.45元，睇番八月底20元起步位，經已累積升咗五成多。5G概念股都蠢蠢欲動，京信通信（02342）升6.7%，而業績爆炸力較遜，但勝在夠平的中國通信服務（00552），連續六支陽燭，上周五再升5.4%，今浪應該有機會上5元樓上。

另一隻長飛光纖光纜（06869），近幾日股價在30元橫行，如果今個星期成交再縮而仲能夠企得住30元樓上，睇款似會再爆一棍上去，不妨睇實。

古勝