中國人每逢節日都想一家人整整齊齊咁食飯，五月時爆出爭產疑雲嘅鷹君集團（00041）羅氏家族今年又點過中秋節呢？
根據羅老太羅杜莉君嘅公關講，羅老太之前有當面或者打電話畀所有仔女，叫佢哋去佢住緊嗰間酒店食飯做節。
不過，喺撤換家族基金信託人一事上同媽媽對立嘅羅嘉瑞（三子）、羅康瑞（四子）、羅鷹瑞（五子）最終都冇出席，中秋節未能人月兩團圓。
雖然有傳話，嘉瑞、康瑞同鷹瑞都分別提前同羅老太慶祝中秋，但羅老太透過公關就話冇喎。
據講過去嗰年半，嘉瑞、康瑞同鷹瑞都冇參加家族逢星期日嘅飯局。羅老太透過公關話「佢哋唔嚟，都最好搵一啲有說服力嘅理由去解釋！」
余絲韻