絲絲講場：香港先生唔做戲 賣保險發圍
好多人期望加入娛樂圈後大紅大紫，但事實總有距離，與其苦苦糾纏，單俊偉（Raymond）就選擇另覓良木而棲。佢○○年加入娛樂圈，之後仲參選「香港先生」，喺娛樂圈浮沉十年後，為畀家人更安穩嘅生活，一○年毅然告別演藝事業，其後轉投友邦香港，從零開始重新打拚。
Raymond笑用「難掌握」三個字概括自身經歷，「娛樂圈係一個等待嘅行業，每日要等公司派通告，冇工開就留喺屋企打機同睇書，好少同外界接觸，與原本相熟嘅中學及大學朋友（Raymond畢業於港大計算物理與軟件工程學系）漸行漸遠。」久久未見事業突破，不經不覺Raymond已三十歲，佢決定轉換事業跑道。
想升總監 建40人團隊
佢喺大學同學牽線下，一一年加入友邦香港做保險代理。佢話自己冇背景冇人脈，當年好彩加入友邦精英學院，接受為期二十六天培訓，對鞏固事業好大幫助。
雖然做好準備，但Raymond話實際「開單」其實有唔少挫折。做咗保險代理後，佢嘗試同舊友重新建立關係，但唔少朋友一知佢轉做代理，就用各種理由令佢「打退堂鼓」，「畢竟大家未建立信任，但之後朋友見我專心做保險，就相信我可以做一世嘅財務策略，依家都成為咗我嘅客。」
成為保險代理後，佢不但生活質素改善，收入較娛樂圈時多約五倍，仲喺友邦香港工作期間結識咗太太，兩人現育有四個月大嘅小朋友。Raymond現已係分區經理，希望可於三年內建立四十人嘅團隊，屆時可升任區域總監。
余絲韻