絲絲講場：1/4散戶Hea做功課又望大賺！
散戶投資前Hea做功課，但又心頭大望勁賺。點Hea法，點心頭大？快睇睇自己有冇份。
唔夠一成人會睇招股書
投資股票、外匯同基金前，點都要做功課啩。投資者教育中心八月做咗個《零售投資者調查》，發現有成24%散戶只係用幾粒鐘去研究！（好明顯，呢班人有啲Hea喎！）
90%受訪者話自己有做功課去了解投資產品，咁信咩嘢作出投資決定？竟然有75%人係聽親戚朋友講！（即是問咗功課當做咗？！）有69%靠睇新聞，35%係聽證券經紀及銀行客戶經理等專業人士意見；真係自己會睇埋招股書或投資文件嘅，得9%，即係一成嘅人都唔夠！
功課Hea做，之但係又心頭高，竟然有成32%受訪者期望年回報有20%以上！喂，追蹤恒指嘅盈富基金（02800）過去五年嘅年度化投資回報率都係得7.4%咋。想年賺兩成以上，有冇諗多咗？
想還想，實際上有31%散戶後悔過去一年投資買錯嘢，點錯法？43%人買咗先發覺資金鎖死期太長，23%話產品同自己之前理解有出入，23%話風險原來咁高，18%發覺原來個投資要睇實，有63%直頭蝕錢。
李博衛後生試過輸鑊甘
連投資者教育中心總經理李博衛都話，投資邊有咁易，佢自己18、19歲讀大學時，亦好鍾意同三幾個朋友研究股票，佢亦落注買過地產股同航空股，結果蝕得幾甘，當畀錢買個教訓咁話。所以，講到投資，靠人不如靠自己！仲有，事前記得做足功課！
余絲韻