古語有云：「物極則必反。」上周三我於本欄同大家預警了一個內房的怪現象，就是二、三線內房股齊齊起飛，就連一些無業績、股價一直沉淪於山腳的，都可以鹹魚翻生。那些劣質的公司，於內房牛市的巨輪下依然係賣唔到樓，業績倒退，但股價呢？就於一周內升逾兩成，真是驚為天人！
上周我唔敢潑大家冷水，只係好心提醒下大家游水時記得着褲，別好似巴菲特話齋：見潮來呀，便唔着褲出去裸泳啦、博大霧啦，到頭來，都是要揀好股才是王道！
估不到未到一周啫，全板的內房已經洗到清清白白！市場歸咎中央調控的力度加大喎！講真，過去一年的調控幾時有收過火呀？係股民炒股炒得太忘形，時運高咯，見住新聞都聽唔入耳啫！與其說今輪的小股災是源於加大調控，倒不如說，是源於瘋狂的泡沫、雞犬皆升，超買了、要爆破了，進入一片死寂！
其實，內房股出事又點會係無徵兆呢！好似我一直推崇的碧桂園（02007）同雅居樂（03383）咁，股價於過去一個月的升幅已逾20%了，到上周中升力緩減，仲日日打十字星，我都想食好耐喇！難得佢於上周五出陰燭、高開低收，我仲唔先食為敬咩！仲有呀，有傳龍光地產（03380）打算批股，即使管理層死口唔認，到第二日股價都照跌可也，仲失守埋「傳說中的配股價」添！你話喇，咁都仲唔係有人走鬼？
事到如今，無論你走到抑或走唔到都好，內房重挫，必唔會於短期內升番足畀你！到底係等抑或唔等呢？你就要問自己：你持有的股份有無業績支持先？如果無，我建議你走先喇；如果有呢？那你都預回家鄉的路要些少時間。
若然有貨的，我不建議加注呀，無貨的亦無謂急於抄底，會跑的板塊還多的是。
富昌金融研究部總監 譚朗蔚（作者為註冊持牌人士）