Market Insight：黃金相關股見好要收

油服股基本面欠佳

至於一眾油服股，古勝認為基本面唔會因為油價短線波動有好明顯改善，如只係因應消息面短炒，都係揀有流通量的中海油或中石油正股或相關輪證入手為宜。

北韓同美國繼續隔空打口水戰，除咗油股揚升之外，金價亦回升，並重上每安士1,300美元樓上，帶動金礦股及黃金ETF做好，其中中國黃金（02099）及恒興黃金（02303）同升逾半成，靈寶黃金（03330）升逾2%；另SPDR金ETF（02840）及價值黃金（03081）同升逾1%。不過，古勝始終認為，除非美國同北韓真係動干戈，否則金價仍維持在1,280至1,350美元之間上落，要突破上落區頂部，始能確認新升浪開始。

既然金價只係炒上落，跟炒相關股份就要轉身夠快，宜盡量走即日鮮及嚴限注碼，並選擇具流通性的對象，免得上車容易落車難！

北水閂閘勢影響交投

美股打噴嚏，港股跟住發軟蹄。恒指昨日開市低見27,308點，不久即見全日最低位27,300點後，騰訊及友邦保險（01299）沽壓較重，惟之後展開反攻，下晝三點後止跌回穩，結果仍能險守50日線，收報27,513點，走勢總算未有進一步轉差。

九連升好快有分曉

投資者須留意，港股通本周四將暫停，至十月九日才恢復，成個禮拜冇咗互聯互通的北水支撐，大市成交亦難免會受到影響。

不過，從另一角度睇，本周初北水狂沽極度超買的汽車股及內房股套現，而恒指最低只係見過27,300點水平，並即日反彈，跌得嚟都算係有個譜！周四期指結算，周五就係基金季結，照計周內最大的波動該喺周三完成，周四、五應該唔會有太大變動。

論到恒指走勢，整體而言都係離不開上落市範圍，且看周四掛牌的眾安在綫（06060），認購凍結的資金將解凍，會唔會有部分重新流入市場，成就恒指九連升呢！

追逐概念 收成需時

講到眾安呢隻新股，認購反應都好耐冇見過咁熱鬧，相信其中一個原因係被其股東背景吸引，其二係有騰訊的成功例子在前，惹來怕執輸的大小投資者爭相播種FinTech第一股。不過，一般而言，市場十分熱切去追逐的時候，往往並非長線入市的合適時候。所以，抱短炒心態人炒我炒，冇嘢好講，但若想作中長線投資，係咪需要喺人頭湧湧的時候來搶高，就見仁見智。

事實上，過去亦不乏港股獲內地科網巨企入股，股價喪炒概念過後，股價都係由璀璨歸於平淡，皆因長線投資者坐貨係睇業績計估值，更何況今次呢隻新股賣點係三大中企股東，可能更加難捉路。

周二古勝再次提及新能源汽車股要從龍頭股入手，即見比亞迪（01211）有好表現，開市早段低見64.1元便止跌回升，午後升幅擴大，以全日高位73.9元收市，升11.63%，強勢畢現。既然龍頭股起步頭也不回，似乎整個電動車板塊遲早要來一次大型重估潮。

古勝