講開畢業踏入現實社會，想出人頭地的話，美國管理大師Suzy Welch話，有5樣喺學校學到嘅嘢，唔該立即忘記佢兼搣甩佢！以下係5個畢業後嘅現實。
讀書時先會話你知要交咩，甚至教你做。喺現實社會，你收得人工做嘢，唔好諗住人家有義務會教你或話你知要交咩貨。唔知點做？睇人哋之前點做、自己搵方法或不恥下問，不過人家唔一定會答。
考試考得唔好，師長會鼓勵你，下次畀心機。Year 1成績唔多掂？Year 2又係新開始。現實社會？Sorry，你諗多咗嘞。點算？每一步都謹慎啲認真啲囉。
求學時，老師會提醒你愈勤力，成績就會愈好。但職場唔同，即使你勤力如牛、每日OT，若結果交唔到貨，你幾努力過都冇意義，事關上司與老闆睇嘅係結果，唔係過程。
讀書時交論文，精簡會扣分，一定要有晒論據、畀多幾個例子、仲要列齊出處。不過，商業社會係相反嘅，冇人得閒坐低聽你慢慢闡述你嘅意見或概念，唔該一切精簡！
讀書時，只要博得負責你份畢業論文嗰位教授讚賞，掂晒。但喺職場，你唔係得一位上司，你上司之上亦有上級，仲有左右隔籬錯綜複雜嘅架構，即使你頂頭賞識你，唔代表其他人亦認同你，請面對現實。
余絲韻