絲絲講場：海航來港天價擸人才

海航尋日喺科大舉辦全球人才招募計劃，人力資源部副總經理郭贇表示，今年無論中、港或美國，都只係去學術排名高嘅大學做招聘，目標係請1,000名畢業生做管理見習生（Management Trainee，簡稱MT）。申請人需要具備良好外語能力，面試時要喺個人談吐、處事風格上要表現出一定水準。

人工高 有機會平住啟德樓

MT人工有幾多？郭贇話唔講得，但透露海航員工薪金連福利喺行業頭25%，過往包括成本價買「員工房」。咁即係可以平買海航嘅啟德新樓？佢就話香港員工宿舍在規劃中。

不過，科大畢業生林小姐就話，冇考慮有冇員工宿舍，出席招聘會只因對航空業管理工作有興趣。同校來自安徽嘅研究生楊先生就話，雖聽過海航最近一啲傳聞，但一來唔到自己評論，二來佢覺得海航好厲害，所以希望可以入去工作。過來人點睇？去年獲聘嘅MT趙伊陽話鍾意公司業務多元化，可以拓展視野咁話。

想Apply？絲絲幫你溫定書。尋日海航集團首席執行官譚向東出席福布斯全球總裁會議，透露集團債務佔資產比率持續下降，近期財務狀況有史以來最健康；上半年投資回報按年增40%，盈利同收入分別按年增45%及119%；集團仲好注視「一帶一路」沿線地區嘅投資，相信有可為。

余絲韻