孖妹S檔案：瞓身炒股男 衰到盡之後......
港股喺今年高位爭持，唔少股友開始覺得突破○七年高位31,958點不是夢！雖知股市嘅數字遊戲從來都係變幻莫測，但大市氣勢如虹之時，往往都會呼喚股友內心深處嘅賭仔心態，不自覺在心魔驅使下注碼愈玩愈大，甚至瞓身炒，不如就睇吓呢4位股友瞓身炒股嘅往事。
炒Call押錯 月失70萬
麥：富昌金融聯席董事 麥振威
投資金句：投資要講值博率，最緊要守紀律。
彩兒：輸錢皆因贏錢起，似乎都係一個定律……
麥：二○○○年嗰陣，我畢業冇耐，儲咗少少本錢，有十幾萬，極少玩正股，而當時窩輪仲未有莊家制，贏錢容易過依家好多，試過半年賺幅六倍，炒到上六、七十萬，後來○一年美國聯儲局開始減息，當時諗住炒開Put，不如反手炒番Call，可惜當時個市唔係好升，心雄之下，有一次真係玩瞓身，見聯儲局議息前，市場因憧憬大幅減息而抽升，我諗住博一博，將六、七十萬本金買Call輪，點知減息幅度少過市場預期，個市急插，我當時就喺一、兩個月內將本利輸清光，成個Office嘅同事都輸得好甘，呢次之後就唔敢瞓身，會嚴控槓桿水平。
去到二○○八年，個市由31,958點冧落去，好多人同我一樣追沽期指，當時個市跌到去22,800點左右，其後彈番上27,000點樓上，我係2張、4張、8張、16張咁追沽，呢次輸咗我70萬元，好彩每次都係輸晒本金就算數，冇輸凸，呢次之後我傾向玩即日鮮，控制風險，開始用程式交易，唔會同投資講感情。
運用程式 預估賽果
Kitty：同股票談戀愛已經夠傻，同衍生產品講感情直情係癡情啊！
麥：我依家用程式做投資及選股，佢可以幫到我做模擬投資先，預估結果，其實我認為，投資勝算唔使一定去到七、八成命中率先得，即使得五成都可以，只要堅持要冒1元風險、就要有2元回報，值博先去做就OK，我亦會將槓桿控制喺7、8倍之下。炒期指唔會用技術分析，MACD嗰啲方法係七十年代嘅，Out晒！
其實內地股市特別影響港股，雖然佢哋期貨市場唔係推出好耐，但我留意到佢同港股期指嘅關連性，所以我會睇實內地期指倉去布局港股期指，以提高勝算。
積蓄買股 狂蝕仍死坐
謝：散戶 謝溢忠
投資金句：輸錢唔緊要，但千祈唔好輸心態。
Kitty：你未夠30歲，已經喺股場打滾超過10年，睇嚟你細細個已經愛刺激喎！
謝：我未成年就開始留意股市，因為自己好鍾意搵快錢，○七年嗰陣我做小生意賺到第一桶金，見到股市勁升，全民皆股，連師奶都成日講股經，當時抽親新股都升，揀到隻股票唔升就只可以當你黑仔喇……所以我喺乜股票知識都冇之下，就喺眾多股評家嘅貼士中揀股買，又試過收風，一買就用30萬蚊玩All-in，掟晒銀行全部儲蓄落去，最初帳面賺幅幾千蚊，隔咗一個月就日日跌，但我又死坐唔肯走，輸到我唔記得咗佢，你提起先記得佢除咗牌，哈哈！散戶就係咁，贏得少又唔肯走；輸錢就唔肯斬！
謝：去到一三年，我先開始睇投資書、上堂學炒技，不過講真吖，到今時今日，我落場炒都仲會受情緒影響，人總係有賭仔心態，見住持倉嘅數字不斷跳上跳落，持貨就會係咁望佢反彈，要嚴守紀律真係難，搞到我銀包長期都好燶！去到一四年，我又試過將約2萬元炒細期，三個月炒上廿幾萬，嗰下賭性又蓋過理性喇，平咗倉即刻反手買即將到期嘅期權，桿槓勁高，只用咗一日時間就一鋪清袋。
思緒混亂 宜停手平倉
彩兒：「分手要狠，講分手不需要等，等等都不會合襯……」見唔對路，梗係要走為上着啦！
謝：一四年嗰役之後，我心態就變咗，深深感受到「輸錢唔緊要，但千祈唔好輸心態」，若然思緒亂時，就要停手平倉，完全隔絕財經資訊，等自己沉澱好先再上路。近年我主力炒期指同衍生工具，今年整體投資回報有七成，雖然港股今年係大升市，但我唔會估市，亦唔會賭單邊市，由於莊家好傾向殺大賠小，所以會(目及)實市場長短倉嘅分布、睇清楚牛熊重貨區嚟部署，亦會睇實市場氣氛，一旦連看更都講緊股票就要小心啲喇。
想博多2% 反輸三成
T：散戶 Tim
投資金句：股票係紙上富貴，投資要講大勢！
Kitty：你係中國通，有咁多內地朋友，依家北水當道，你一定收唔少堅料？
T：我股齡唔長，第一次入市係一五年初，係朋友畀貼士我炒A股，用閒錢玩吓，見第一、二、三次回報OK，咪愈玩愈大，因為當年係大時代，市場氣氛好熾熱，覺得係時候要加倉，所以就將全部銀行儲蓄放晒落去，一放就勁驚，你知啦，幾十萬唔同幾萬蚊喎！當時我日日(目及)實個市同股價，完全冇心機做嘢，搞到做服務性行業嘅我賺少咗好多佣金，真係幾後悔。
寧買樓及玩虛擬幣
T：食過翻尋味，內地朋友推介我買一隻無人機概念股，我一炮過將銀行80萬元人民幣儲蓄放落去，好短時間就升咗22%，見有得賺就沽出套現……隔咗一個月，我就再問呢位朋友攞貼士，買入一隻內房股，帳面賺幅最高峰有48%，但我自己貪心，想等佢賺五成先沽貨，點知股災就發生喇，當時日日見住佢跌停牌真係冇眼睇，最終係輸咗28%，令我呢一年打回原形。我覺得股票係紙上富貴，投資要講大勢，勢好，買乜升乜，勢唔好，基本因素幾好都冇用。
彩兒：你依家連股都唔炒，究竟搞邊科？
T：見過鬼就怕黑，亦知道分散風險嘅重要性，投資要睇自己輸得起幾多，而唔係有幾多本，始終注碼影響決定，一五年尾，我就轉玩香港藍籌股，買入騰訊控股（00700）抗通脹，貪佢揸得心安，不過，去到一六年頭就沽出，拎本金買樓，其後就少掂股票。
T：今年我了解過虛擬貨幣區塊鏈嘅技術同安全性之後，已經成為佢忠實Fans，用10萬元喺180元人民幣水平買入萊特幣，中間亦不斷炒波幅，年初至今賺幅約3倍。
輸到醒覺 拜師學藝
甘：臉書網誌《炒仔日記》筆者 阿甘
投資金句：唯快不破，短炒最緊要眼明手快，做足功課！
彩兒：你今年炒股成績靚仔，有兩倍，究竟你點練成你所講嘅炒股招式？
甘：唯快不破！我已經練足22年喇，九五年入行做金融業，亦做過紅衫仔（出市員），緊貼市場氣氛，亦見盡世態炎涼，我做過一間金行旗下嘅證券行，九七年見到人哋瞓身炒紅籌股、垃圾股，輸到要拎金條落行補錢。以前剛入行冇乜本金，所以好多時要「篤手指」，唔過得夜，自然就要練短炒技術、睇盤路。
晨早索料 快手掃貨
甘：九七至○○年，我篤手指就篤得最勁，聽貼士亂炒垃圾股，好多時上晝拎到10萬、8萬支票，下午就輸晒，試過一年半載就輸50萬元，當時真係細個唔知驚，但輸得勁時，真係落盤隻手都震緊！去到○五年，我先拜師學藝，開始研究輪證與正股之間嘅關連性、影響度，甚至盤路，當然會知邊間輪商最茅，一定要避開。
Kitty：唔怪得你依家記冧巴當食生菜，落盤時似足摩打手！
甘：對手係炒股嘅重要財產嚟，掃貨要夠快！我每朝六點半開始睇港交所通告、新聞、宏觀經濟數據、公司業績，同Check CCASS（持股紀錄），開市睇異動、成交等，邊啲股多炒鬼入、有股仔「搭棚」、電腦程式盤，一定(目及)到實。今年炒股成績OK，主要受惠內房股同科技股。
Kitty、彩兒