前陣子，一位同業友好於Facebook上提到佢用生日日期當成幸運冧巴買股票，結果買了前海健康（00911，前稱恒發洋參）而輸大錢的事。我唔知係真定假呀！
這篇文章並不是用來笑同行，我只是想借這個機會講吓我同比亞迪（01211）之間的恩仇，咁講，相信大家都知我的生日就是十二月十一日。過往曾經經歷了幾多次的失敗，每次於市場熱炒汽車板塊的時候，就仆倒去買比亞迪。結果，當然是碰到一鼻子灰！
已經有N次了，我趁股價突破了46蚊的阻力位然後追突破，過兩日之後，又因為股價回跌失守46蚊而止蝕，直到這一次……得喇，唔使恭喜我，今次我無買！
皆因我已被那差到離行離列的產銷數據害得無反應，又怎料到於今次，只是一個隨時都要廿年才兌現的取代傳統汽車方案，同一個外資參股撤限的政策，就令股價於十個交易天內飆了五成！
有大行睇到100蚊喎！你問我依家仲追唔追？我有保留。始終我會界定今次的「升災」是炒政策、炒預期而不是炒實質。實質是集團的中期純利倒退24%，又預期今年頭九個月的純利按年跌兩成。這樣的數據，現價追真係無防守性，有貨的可揸緊少少，直到陰燭出現，高開低收喇，才分兩至三注套利，第一注就於跌穿68蚊的時候走啦！
富昌金融研究部總監 譚朗蔚（作者為註冊持牌人士）