Market Insight：光伏股似見底回升

咁多間車廠，點解騰訊會揀廣汽合作？原因會唔會同兩者的業務基地都喺廣東有關，不得而知。姑勿論如何，若然兩者合作真係傾得成，將大大提升廣汽研究汽車電動化、聯網化及全球化的能力，有不少憧憬。

當然，現時兩者商談僅初步階段，提防股價會有調整，想作中長線收集，可待回試15至16元水平再見機分注行事。

要吼冷門板塊，不妨睇睇光伏股。呢個板塊經已靜咗一段長時間，但留意到最近有見底回升之象，到底係博大霧短炒一轉抑或真係轉勢，就尚要觀察。板塊中，保利協鑫能源（03800）上周由0.9元水平起步，升至周二高見1.11元；卡姆丹克（00712）股價自本月上旬由0.27元起步，升至周二高見0.36元；順風清潔能源（01165）股價亦由上周初的0.35元升至本周初高位見0.5元。

論人氣，都係保利協鑫最高，但若論勢頭，則見隻信義光能（00968）都唔曳，周一調整，周二即收復失地，以全日高位2.88元報收，睇勢有機試衝3至3.2元區域，主要支持喺2.6至2.7元水平。

冷門內房漸散發鑊氣

內房股抖氣，但個別仍能突圍而出，如融創中國（01918）持續強勢，周二再升9%收市、中國海外宏洋（00081）亦升7%。

上實城開要望多眼

至於較落後的二、三線內房更見發力趕上，如合生創展（00754）股價急飆20%至9.64元收市，成交9,095萬元；眾安房產（00672）升10%；中國新城鎮（01278）升21%。

其實，呢期確實有唔少冷門內房唔聲唔聲升咗上嚟，如天譽置業（00059），股價低迷多時，六月自1元起步，升至上周高位見2.36元，一係唔發市，發市當三年咁款！

類似市值未過百億元兼且近期交投同股價有異動的，仲有綠地香港（00337）及招商局置地（00978），可以望多兩眼。至於仲未走出低谷等人燒冷灶的，就有上實城開（00563）。

切忌同市場對着幹

港股回氣，但恒指周二仍守在28,000點樓上收市，主板成交有996億元，暫以整固看待。美國聯儲局議息，市場預期可能會宣布確實的縮表時間，此前港匯轉強，1個月拆息亦告上升。

不過，古勝始終認為，市場已一定程度消化縮表之舉，股市短期有調整不出奇，但不致於因為呢個消息而出現大冧市。反而，當呢個因素明朗化，升市又少個後顧之憂，有機會繼續衝高迎「十‧一」長假及十月中的「十九大」。所以，唔信後市會破頂，最多唔玩，咪同維穩力量對着幹。

今年恒指反覆向上，突破逾兩年高位，都有唔少人跌眼鏡。瑞銀最近就發表報告，將今年底恒指的目標價定在29,507點，理由係預期互聯互通南向資金規模佔港股交投比例趨增，長遠有利帶動港股交投，故同時將香港交易所（00388）的投資評級由「中性」調高至「買入」，目標價245元。

在下都係覺得，港交所價位較大，相信嚟緊股價會繼續後發先至，至於策略會傾向從相關衍生工具入手，以小博大。

古勝