絲絲講場：碧咸諗定幫仔女上車？

好多香港慈父慈母何止幫仔女畀首期，甚至送成層樓，咁碧咸又點睇？呢位二十四孝老竇話：「絕對唔會對仔女放手唔理！」不過佢認為，最重要嘅並非關乎於物質支援，而係對仔女嘅支持，「最重要係仔女無論開心與失落時，都感覺到父母企佢哋身邊！」

會定期檢視保單配置

香港父母另一特色係望子成龍，碧咸話：「好多人以為我想仔女繼承衣缽做足球員，但其實最緊要係佢哋覺得開心，對自己想做嘅事有熱情！」佢仲話，二仔鍾意打網球，細仔鍾意彈結他同唱歌，而孻女反而啱啱開始鍾意踢足球。碧咸笑話：「講唔定日後Harper Seven（孻女）會成為足球明星！」

既然對仔女如珠如寶，當然要做足保障啦，所以碧咸覺得保險好緊要，因為係對自己同親人嘅一份保障，「更重要係鼓勵大家由依家呢刻要開始健康嘅生活！」至於邊種保險產品係最重要？佢就話覺得所有類型嘅保險各有用處，佢自己都會定期檢視保險配置。

健康由生活細節做起

講到「活得更健康」，係咪要用好多錢？碧咸話健康唔一定要花大錢，應由生活細節做起！佢話自己係「普通老竇」，會接送仔女返學放學、陪仔女去公園玩，或者放吓狗咁，都可以令生活更健康。

見到碧咸又點可以唔講波？出身曼聯嘅佢，覺得曼聯今季開鑼踢得唔錯，喺領隊莫連奴（Mourinho）嘅帶領下表現不俗，兼且又買咗年輕嘅好球員，佢作為粉絲，對曼聯今個球季嘅表現相當期待！不過佢又話，其實曼城、車路士、利物浦、阿仙奴同熱刺實力都不容忽視喎。

余絲韻