統計發現，香港六成上市公司及超過六成私人企業都屬於家族企業，當中唔少仲由一代傳一代。企二代、富三代有父蔭，成功需「父」幹。不過尋日有富後代企出嚟話，其實「有苦幹」至真，佢哋有苦自己知。

九龍表行第三代成員、現任總經理黃家恆（Kevin），當年上一代管理層年邁，又正值零售業低迷，叔叔就請佢由紐約返香港幫手打理家族生意。

返到嚟香港，佢無空降管理層，而係去旺角分店做個普通鐘錶銷售員，一做就好幾年，仲做到Top Salesman（最佳銷售員）添。佢話由低做起嗰幾年，可以親身接觸每個員工同了解運作。

Kevin並非繼承自嫡系，坦言接手時當然有困難，但經過與每個家族成員單獨坐低傾談後，最終大家都支持佢掌舵。

年輕一代多醉心創業，唔願接手家族生意，但Kevin就兩邊兼顧，約兩年前自己再創立Origami Labs研發智能語音戒指！所以，苦幹同父幹其實係無衝突嘅。

講開家業傳承，華人家族企業似乎尤其易中「富不過三代」魔咒。科技大學陳江和亞洲家族企業與創業研究中心指出，全球現存百大古老家族企業無一係華人，只有少數年收入超過5,000萬美元（約3.9億港元）嘅華人家族企業可以傳承超過一個世紀。

要打破「富不過三代」魔咒，科技大學金融系兼任教授金樂琦認為應設立家族辦公室，既可維繫家族成員保持和睦，亦可借助不同家族成員嘅能力去發展多元化業務，避免故步自封。佢又提到，與華人家族企業不同，傳統日本家族，會透過領養及入贅夫婿等方式去傳承家業，就如「竹」般中間通心（並非一味靠血脈），亦能一節節地生長。

余絲韻