Market Insight：環保股宜吼位低吸

北控水務受惠PPP模式

過咗立秋，天氣無之前咁。啱啱踏入九月，霧霾已經殺入北京，比以往來得更早。儘管中央聲嘶力竭話要同環境染污開戰，卻未見成績。環保減排已經係中國的長期鬥爭，會唔會趁入秋前，一眾環保股又再落鑊，見依家普遍估值都幾吸引，值得大家做定功課。

有兩隻心水股，光大國際（00257）上月中出咗份靚靚成績表，盈利勁升四成八，股價挾上10.78元後，近日個市氣氛麻麻，股價輾轉返回起步位。現價一七年市盈率14倍唔到，作為垃圾發電龍頭股，花旗睇13元，去到10元邊諗得過。

另一隻北控水務（00371），中期純利升兩成二，撇開一次過項目實升三成七，轉以公私營合作（PPP）模式有利未來簽訂更多大型新項目，近個幾月股價在6.2至6.7元上落，睇吓短期有無機會再摸多次底，可吼位低吸。

政府房屋政策又變過

隔晚美股道指顯著低收，拖累昨日港股低開低走，恒指最多曾跌319點，惟午後股王騰訊反彈，結果埋單計恒指跌127點，收報27,613點，主板成交回升至896億元。

走勢上，恒指20日線失而復得，仍處於上周高位28,128點以來的調整浪之中，若短線能守得住20日線，則可視為與八月上、中旬的兩次調整相似；若失守則本輪調整有機會下試50日線26,940點水平。

藍籌地產股走勢偏軟，最叻係隻恒基地產（00012），逆市升0.6%，新世界發展（00017）及恒隆地產（00101）分別升0.19及0.1%。聽聞政府發放話會推出港人首置上車盤，價錢愈便宜，限售條款就愈多，但最終目的要係讓擬置業的港人可以安居樂業云云。聽落似係倣效新加坡的組合屋之類，但當然單位面值無法比擬，但此舉意味着特區政府的房屋政策轉變，對地產股的估值有何影響，值得投資者深思。

虛擬貨幣難全面封殺

內地大媽近年熱衷炒虛擬貨幣，既可升值又可達到走資效果。中國搖身一變，成為比特幣（Bitcoin）最球交易量最大市場。搵錢嚟得容易，首次代幣發行（ICO）如雨後春筍般，上半年至少籌到26億元人仔，近日官方調查認為當中大部係呃錢玩意，早兩日人民銀行終於連同七個部委一刀切叫停ICO。

一拉閘，啱啱磅咗水的的ICO，恐怕係瓜多過菜。以為其他虛擬貨幣受內地炒家鳥獸散影響，九死一生？點知近兩日隻Bitcoin由5,000美元殺到落4,000美元邊，眨吓眼反彈到4,600美元邊水平，走勢頑強。

昨日有個杜拜地產商Knox Group，旗下新盤近六成預留備Bitcoin付款買家，雖然被標籤成黑客及恐怖分子資金轉移的無王管地帶，不過虛擬貨幣在網絡底下無遠弗屆，亦開始受到更多地方的交易認可。睇嚟各國政府要禁都唔容易，只能作有限度監管，免得爆起煲上嚟，連傳統金融體系都受牽連。

古勝