Market Insight：手遊股趁佳績炒轉

狂人「侵侵」趕緊份稅改方案送上國會，北韓金仔驚死對手無反應，試射導彈飛越日本國境未夠皮，周日玩埋地下核試。若非善忘，○三年美國小布殊政府，為出兵取得國際授權，夾埋英國砌伊拉克有大殺傷力武器，大軍壓境。今日北韓核試、導彈樣樣齊，美國以至周邊國家依然動口不動手，假如之前粒導彈載有彈頭，日本經已死得人多。

今次弔詭之處，在於全世界都擺出愛好和平，冷靜到得人驚的姿態，真係睇死北韓只能拋浪頭？發展落去，投資者至驚係挑釁行動會不斷咁升級落去，擦槍走火就杰撻撻。

萬洲新高賀「入藍」

八月份美國就業數據無市場預期咁好，加息預期降溫，港股夜期做好。八月期指已順利高位埋單，今日大戶會唔會趁機放軟手腳，風險未可抹殺，想買指數衍生產品的，睇完個上晝市至決定未遲，攻上28,500點最大阻力前，相信市況仲有一段反覆上落的日子。

上周五港股先升後回，恒指埋單跌17點收報27,953點，兩萬八大位得而復失。市況也趨向個別發展，風災的影響漸過，濠賭股見反彈，收市後「豬肉佬」萬洲國際（00288）正式進身藍籌，指數基金掃高，升2.8%報8.41元，收市計創歷史新高。

網龍勁升吐烏氣

此外，愈接近「912」蘋果公司發布會，概念股繼續強勢，舜宇光學（02382）升2.1%，隊完兩日隻丘鈦科技（01478）彈番7.4%收報19.6元。績後急升的愛股網龍（00777）再爆第二棍，升10.5%收報31.85元，上周升足五日，累升31.3%，陰陰乾成年捱足咁耐，捧場客今次乜仇都報晒。

騰訊（00700）公布業績後，股價見341元之後遇阻，資金似有流向其他新經濟概念股的傾向，手遊股IGG（00799）派成績表，中期賺7,620萬美元，按年增1.94倍，半年條數經已超越去年全年7,261萬美元的水平，每股盈利5.76美仙，中期息13港仙外，額外派特別股息22港仙。

IGG估值唔算貴

業績受主打遊戲《王國紀元》整整六個月收益入帳帶動，表現理想，股價反應唔大，主要係去年底股價5元起步，七月高見過14.3元，春江水暖，股價早已跑於業績之先。

另外，仲要睇埋《城堡爭霸》及《領主之戰》的後續遊戲表現，但估計全年賺過億美元應該沒有懸念。

IGG一七年預期市盈率估計介乎16至20倍，唔算貴，資金輪流炒，轉飯鑊睇番IGG一啲唔出奇，尤其業績前沽空有異動，業績對辦隊唔落，短期會唔會挾淡掉轉頭炒？值得留意。

古勝