絲絲講場：賣衫做首富 靠5招贏晒！

奧爾特加係西班牙上市公司Inditex前主席，公司旗下除Zara外，仲有Pull & Bear同Bershka。佢今年81歲，早已退下Inditex火線，但仲係大股東，坐喺度收息收到笑。

佢無父幹而有今日嘅才能，佢叻喺邊？大家學嘢。

1、一個字「快」

佢七五年創辦Zara，賣點一個字——「快」，每兩周就要更新存貨，於48小時內接收訂單，總之要出奇制勝、先發制人。

2、留意客人需要

要知道潮流，就要留意啲人着緊咩，睇佢哋想要咩，佢完全唔理Fashion Show來決定賣咩，反而係追蹤Blogger同聽客意見，話咁先夠潮。

3、控制供應鏈

當唔少同業貪人工平而喺中國生產時，佢反而主力喺番西班牙、葡萄牙、摩洛哥等自己地頭生產，慳運費，兼縮短供應鏈距離，令產品出得更快有新鮮感。由於生產地近，仲可節省存貨，減低因滯銷而來嘅損失。

4、做老細唔離地

佢14歲就要輟學出社會賺錢謀生，受盡白眼。不過正因出身基層，佢同員工共事時亦絕唔離地，出名平易近人。

5、對自己有要求

佢講過：「人最差就係自滿，成功永遠冇保證。我永遠唔容許自己對所做嘅每一件事感到滿意，亦向身邊每一個人灌輸呢個觀念。人生就係，一係成長，一係去死，如果想創新，先唔好在意結果。」

余絲韻