絲絲講場：友邦香港CEO「戴」仔女返工
友邦香港及澳門新首席執行官顧培德（Peter Crewe）履新後第一次見傳媒，而呢位新CEO最吸睛嘅，係佢恤衫上嘅一對銀白色袖口鈕！對袖口鈕造型係佢一對仔女嘅中文名「瑤」字同「揚」字！
話說Peter英國出世，但好早已經過嚟香港做嘢，其後被調任去唔同地區，服務友邦集團（01299）23年。Peter話好慶幸識咗香港太太，雖然太太並非友邦員工，但都相差無幾，因為做「跟得夫人」付出咗好多，兩人育有一對十歲嘅龍鳳胎，好幸福！
與友邦中國「友善競爭」
Peter笑指，自己中文學藝未精，依家努力惡補緊，下次見面可以測試吓佢嘅學習進度咁話。
啱啱接手港區新CEO一職，Peter話未來整體業務策略唔會有太大轉變，希望可以保持增長勢頭，日後會投放更多資源喺科技同人才培訓。
公司內地業務增速已超越香港，被問到日後會唔會連業務貢獻都爬過香港頭，Peter話內地人口同機遇都好大，可以同友邦中國「友善競爭」，大家相互學習對方嘅優點咁話。
余絲韻