絲絲講場：見工必Out七個小動作
講開「生存伎倆」，絲絲又送幾招畀大家。面試想一擊即中？閣下嘅肢體語言最重要，係對方對你嘅第一印象。唔想未開口已被Out？切忌以下7個小動作。唔只啱見工，與客初次見面傾生意一樣啱。莫講話新丁，就算係老手好多時都未必記得，溫吓書好。
1、【頭耷耷或兩頭望】
即使有幾怕醜，又或習慣四圍望都好，缺乏眼神接觸就係冇信心嘅表現。想留下好印象，記緊抬起頭做人，仲要望住人。
2、【寒背】
坐直嘅姿勢先會令人覺得你願意工作，並能顯示你態度認真。
3、【握手軟弱無力】
握手握到軟弱無力，印象肯定差，對方甚至會質疑你嘅工作能力。點握手先叫好？須憑經驗嚟判斷，握手後宜觀察對方反應及肢體語言，睇睇對方感受。
4、【身體拗後】
發言時，要將身體傾前，然後先發表意見。事實亦證明，身體向前傾會令人覺得你勇於表達，相反，同人講嘢時身體傾後，人家會覺得你唔投入兼冇興趣講落去。
5、【只睥住對方對眼】
肢體語言專家話，「眼望眼」已經係六十年代嘅溝通方式，今時今日想要令人感覺自然又自信，你可以先望對方臉部幾秒，然後眼、鼻等又幾秒咁。再講次，唔好再以為望到實就好有禮貌！
6、【木口木面】
雖然傾緊公事，但唔代表你要「木口木面」，你以為自己咁樣顯示嚴肅，人家覺得你「黑口黑面」。微笑可以拉近人與人之間距離，傾落自然得心應手！
7、【不停Un腳或搓手】
不停「Un腳」或搓手，足以反映你煩躁不安。要解決呢個問題，你需要有更充足準備，見面前先睇定對方公司資料，諗定點自我介紹咁，會有幫助。
余絲韻