恒生銀行（00011）員工正呀喂！副董事長兼行政總裁鄭慧敏上場，即打福利牌──加假！
聽講恒生發出內部通告，明年一月一日起，8,000名香港員工中，超過一半（約4,500人）可享有更多年假日數，逾三成（約2,500人）可獲增加4天年假。新一姐呢招真高明！
恒生嘅有薪年假福利，原本一向已屬本地市場嘅最高水平之一，不過佢哋好慷慨，最近更就年假政策進行檢討。新制度下，員工每年有薪假期為18至30天不等，視乎職級而定。如果係一一年一月一日之前入職嘅第三級或以上管理級別，最多有成32天年假！
除此以外，聽講佢哋仲有好多唔同嘅有薪特假，包括1天生日假、14星期產假、14星期領養子女假、10天侍產假、2天義工假、5天公職假（因公職好似輔警、醫療輔助隊及民安隊要入營訓練時用）及4天考試假畀員工參加專業學會考試咁。
成篇咁多個「假」字，睇到絲絲想即刻放假！
余絲韻