絲絲講場：馬化騰親教學生做生意

參加今次青年營嘅香港學生有60人，喺深圳騰訊大廈基地接受為期一周嘅連串科技體驗及挑戰，好似駕駛無人機及模擬操作戰車，仲有得參觀內地知名企業總部，及喺城市穿梭體驗無現金生活科技等。

體驗營周三進行到第四日，學生有機會同馬化騰面對面交談。傾到香港，佢話公司當年喺香港上市，仔女依家亦喺香港讀書，所以佢對香港有獨特感情。

不過佢覺得港青對內地科技發展唔太了解，所以望舉辦今次體驗營，開拓粵港澳三地青年視野。

青年營體驗無現金生活

講講吓，馬化騰仲同班學生分享佢嘅生意大計。佢話內地移動支付發展迅速，今年總支付量已超過美國50倍。佢話自己公司正計劃將手機移動支付消費模式推廣至香港，但目前面對嘅限制較多，如微信支付喺港澳地區大多只能綑綁信用卡，普及性遠遠唔夠，所以騰訊依家與金管局傾緊，明年可能會有大進展。

唔只講，騰訊仲試畀你睇。個營其中一個重點係「無現金體驗日」，百名學生分組，一毫子現金都唔使帶，只用騰訊安排嘅電子器材，以虛擬遊戲貨幣喺租單車、去書城買書同去商場食嘢。咁樣向未來主人翁Soft Sell，絲絲佩服！

余絲韻