道富最近真出手，識別出476間佢哋有份投資、但冇女董事嘅公司，逐間去信或打電話清楚表達立場，講明喺呢啲公司董事會提名與公司治理委員會重選董事或主席之時，道富會投反對票。雖然道富無開呢400幾間公司嘅名，但投票紀錄好快會喺九月監管文件揭曉。
貝萊德投過反對票
其實除咗道富，同業貝萊德（BlackRock）今年亦以股東身份對某啲公司出過手，支持咗八個有關董事多元化嘅股東提案之餘，兼對啲全男班董事局嘅提名投過反對票。
今次道富表明會畀時間啲全男班董事去改變，仲話自己係有耐性嘅投資者，但就補充一句「唔係永遠」，即係叫班男董事唔好嘗試挑戰道富耐性嘅極限囉。
余絲韻