絲絲講場：歐達禮放暑假擺低證監抖氣
近期香港證監會頻頻出手打擊市場違規，監察同調查工作一大籮，所謂吊頸都要抖抖氣，證監會行政總裁歐達禮就趁住暑假放假幾個星期離開香港，去外地度假。咁邊個睇住個場？就係證監會市場監察部執行董事雷祺光做Acting CEO（署理行政總裁）。
歐達禮上個月中至喺香港發表「重要講話」，話證監會將會加重火力，更頻密運用法定權力去對付嚴重上市公司違規，審批新上市申請時甚至會繞過港交所（00388），直接向申請人提出問題、DQ新股，市場即時嚇到「聞風喪膽」。
雷祺光做署理CEO
原來歐達禮喺講完「重要講話」後，就放假幾個星期，不過，大家唔好以為佢唔喺度，就可以側側膊乘機「作反」！相反，絲絲聽到證監會內部有唔少聲音話工作量實在太多，做到手都唔停。市場中介亦都話時常收到證監會提問同「溫馨提示」咁！
絲絲就好奇，點解雷祺光會做署理行政總裁？原來每次行政總裁放假，證監會嘅五位執行董事都會輪住嚟做Acting，一直安排都係咁，大家唔使大驚小怪！
余絲韻