孖妹S檔案：揀藍籌股有咩條件？

恒指一向係被市場廣泛引用為反映港股市場表現嘅重要指標，指數成分股包含市值最大，同埋成交最活躍而又喺港交所主板上市嘅公司，同時包括H股及紅籌股，成分股經流通市值調整，去反映佢嘅可投資性。仲有啊，為免指數偏重個別股隻，設有10%的股份比重上限；設有4個分類指數，有金融、公用事業、地產同埋工商業。

滙控騰訊各佔一成

恒指公司每季都會對恒指成分股進行檢討，而納入股份嘅原則，會睇總市值、成交排名、同埋財政狀況等等，依家最重磅嘅成分股係滙豐控股（00005）同埋騰訊控股（00700），同樣都係佔約10%。睇番恒指4個分部，截至上周五，金融股比重佔比最高，共12間公司就霸住咗高達48.81%，再喺呢個分部加新貴機會即時低一截啦；公用事業（5間）佔比有5.37%；地產（10間）佔10.65%；工商業（23間）佔35.15%，原本喺呢個分部嘅百麗國際（前上市代號：01880），由於已退市，喺七月十八日被剔除，恒指會維持「50缺1」直至八月十六日公布指數檢討結果，百麗張「空櫈」究竟之後會係邊個坐？大家就要密切留意喇！孖妹私底下都有估新貴，輸嗰個要請贏嗰個去High個靚Tea。