孖妹S檔案：恒指季檢 捕捉染藍潛力股

舜宇光學值得買入一博

馮：豐盛金融資產管理部分析員 馮宏遠

Kitty：月中恒指季檢，呼聲最高唔使講，梗係隻舜宇光學科技（02382）啦！

馮：呢隻堅係心水，原因都離唔開嗰啲啦，Match到被納入嘅條件，雖然恒指公司冇講明，但就有提過恒指科技股成分唔足，事實上，科技對經濟貢獻大，恒指就遲遲未反映，以金融、地產股佔多，時代變緊，市場有聲音想恒指公司加入科技股，但要Match到納入條件嘅公司真係少之又少，金山軟件（03888）已經好勉強，其他手遊股就唔好提啦！雖然之前瑞聲科技（02018）畀沽空機構狙擊，搞到其他蘋果公司概念股都一度受到拖累，不過舜宇光學好快起番身，皆因公司「體質」幾好，市值足、有約一千億元，有足夠流通量，所以佢入選機會有六成，今次唔得，下次都會得，值得買入博一博。

唔對路即走勿長揸

馮：另外一個考慮因素係「水位」，因為咁啱佢股價衝完業績之後，喺平台整固緊，仲未有資金衝入再炒，可見未來再炒機會大，佢基本面實淨，就算今次染唔到藍都未必會跌。再者，現時市場未有特別憧憬佢染藍，股價未反映事件，所以可炒一轉，不過，謹記今次係事件性嘅投機，唔對路就要記得減持或直情轉身走人，千祈唔好無喇喇又短炒變長揸喎。

彩兒：吓，又話係心水，點解得嗰「六成」機會咁奀o架？

馮：唓……彩兒，無人話畀你聽，今次季檢一定會加股份落去o架嘛！今次雖然係百麗國際（前上市代號：01880）因退市而被剔除，大家覺得要補番一隻落去，但呢件事唔係必然發生，若然係有隻股份市值低、落到去下限，要踢走佢再換一隻，咁即時加一隻股份嘅機會反而更高，今次加股份入恒指係咪有必要性，值得商榷。

敏實集團冷門之選

Kitty：你又有啲道理嘅……

馮：另一隻我覺得有四成機會入選，佢就係敏實集團（00425），佢好多條件都Match到要求，但佢就唔係科技股，而係一隻汽車零件股，佢市值約380億元，冇舜宇光學咁大，舊年盈利增長達35%，增長唔錯，不過佢被納入機會唔算太高，係冷門之選，個人就唔會博佢啦，投資者要自行決定。

豬肉股夠生活化或跑出

黃：晉裕環球資產管理投資研究部策略師 黃耀宗

彩兒：個個都估舜宇光學染藍喎，萬一爆冷咪一地眼鏡碎？

黃：我反而覺得有爆冷嘅機會喎，事關依家恒生指數同國企指數嘅成分股愈來愈似，如果一樣就冇乜意思啦，若然國指第時可以改例，正式加入民企股，到時就有機會加添科技板塊，將舜宇光學納入去，咁恒指就會有爆啲嘅股份啦！

所以我覺得可以由生活出發，去估計恒指會添加邊類股份，好似萬洲國際（00288），佢市值過千億元，做豬肉又貼近生活，有代表性，盈利增長唔錯，有成交量支持，過去幾年較少人提及，因為恒指傾向納入新經濟股，所以忽略咗佢，相信佢有六成機會入圍；舜宇光學就係今次大熱，八成機會係佢。大市抖緊氣，若果想提前部署染藍潛力股，可以等股份回落到20日線附近再諗。

Kitty：你仲有啲乜嘢另類之選？Surprise Me！

豐盛金融馮宏遠稱，恒指季檢唔一定要補回百麗騰出的空檔。	晉裕環球黃耀宗指，玖紙盈利增長強，有兩成機會成為新貴。	市場估計有潛力入恒指股份

創科實業升勢轉弱

黃：以前有段時間大家都怕咗經濟周期股，但周期見底，或者反而有動力推升指數添！其中，紙業股嘅供求關係趨向健康，紙價喺淡季都企得硬，玖龍紙業（02689）盈利增長強咗，增長回落情況已見底，睇番同業，部分近期仲發過盈喜添，所以我估佢成為新貴嘅機會有兩成。

另外，以前隻創科實業（00669）都曾經多人講過，我都放佢喺我監察名單，不過，近期升勢明顯弱咗，佢盈利主要來自北美，呢吓似乎扣咗分。

彩兒、Kitty

若有料報畀彩兒同Kitty或有嘢問，可電郵money.biz@on.cc