Market Insight：新盤銷售旺 短炒美聯

港股處於業績期，嚟緊地產股亦會陸續公布業績，見到上周股價遍普向好，長實地產（01113）業績打頭陣，成功為板塊創建良好氣氛，順勢押注，可以望望隻恒隆地產（00101），上周五其股價企穩20元關樓上收市，板塊氣氛配合的話，是浪目標再試21元阻力位，失守19.2元止蝕。

搵隻冷腳，可以睇睇美聯集團（01200），今年新盤銷售宗數及金額均顯著上升，美聯早前已公布今年首五個月錄得淨利潤1.2億元，並預計首六個月將錄得綜合淨溢利，即同比將轉虧為盈。

老實講，喺現時重磅股當道之下，二、三線股都係次次選，再加埋依家樓市肯定係喺頂部，行業下行風險正在累積，中短線都係先避其鋒。不過，美聯喺香港物業代理業界有一定市佔率，相關股份又唔多，遠的不敢說，嚟緊地產板塊氣氛若升溫，短炒一轉業績又唔係咩稀奇事，就睇實交投，若成交有異動，小注短炒目標睇2.4元，失守1.97元嚴守止蝕。

資源股發力吼江銅

上周港股做好，恒指升抵27,500點水平整固，平均成交額按周升11%至922億元，真係幾唔錯。後市能唔能夠上28,000點？咁多重磅股等住公布業績，古勝認為區區再上幾百點實在唔係咩問題，反而係要留意大市成交能否維持在一定水平，以判斷資金進出，才能衡量後市係回吐壓力漸增抑或繼續維持偏強。

上周資源股持續發力，上周鞍鋼股份（00347）及馬鞍山鋼鐵（00323）迭創52周新高，其中鞍鋼股價已重上接近一五年高位，而馬鋼股價更已突破一五年高位。

觀乎兩股一五年度盈利均倒退，一六年度持平，一七年度首季同比大有增長，可見股價回升亦有道理，但業績改善會去到邊個水平，就要等中期業績數據公布始可判斷，現水平冇貨的話會選擇靠邊站，畢竟估值已一定程度反映對業績的憧憬，要博在下寧願揀江西銅業（00358）。

深國小注跟勢博破頂

美國就業率持續下降，以及平均時薪趨升，近月持續弱勢的美匯指數亦見反彈，不排除下半年通脹會達到聯儲局作出加息決定的參考水平，形勢應有利金融股表現。

大笨象滙豐控股（00005）公布中績後股價一直喺78至79元水平徘徊，古勝覺得可以跟進，一旦大成交確認突破80元關，可以開轉快車，直指85元關。另一隻可以留意的金融股係渣打集團（02888），績後因未有派息緣故股價回落至80元邊，亦係冷手執個熱煎堆的機會。

喺一四年十合一的深圳國際（00152），唔經唔覺「升呢」基金股經已三年有多，股價最多已累升近五成，今年六月底股價再逼近一五年高位接近15元水平，上周五收報股價異動，收報14.1元，升7.63%，成交增至1.25億元。

估值大有重估空間

事緣大摩發報告，預計深國未來六十天股價將上升，概率介乎60至70%，給予「增持」評級，目標價19.25元，理由係有信心集團好快會實現前海土地的價值。以現價計，深國往績市盈率12倍，市帳率1.38倍，若前海土儲價值顯現，應能引發估值重估，小注跟勢博破頂，止蝕位定喺13元。

古勝