絲絲講場:玖紙董事局增添「小鮮肉」

又有「企二代」入董事局!踏入60歲花甲之年嘅玖龍紙業(02689)董事長張茵,今次搵嚟「小鮮肉」加盟。呢位「小鮮肉」之唔係其胞弟兼公司執董張成飛位公子張連鵬,佢空降公司做非執董,令玖紙董事局又多一對父子檔。

張茵25歲外甥加盟

九十後嘅張連鵬年僅25歲,畢業於紐約大學持有文學學士學位,做過美國打工仔,兼有行政、項目管理、會計同企業融資方面經驗。張茵對呢位外甥算唔錯,講明每年董事袍金有72萬蚊人仔,而張茵親生仔劉晉嵩當年要捱足三年半,由非執董升格為執董之後,先有董事袍金及津貼等落袋。

不過,九十後「企二代」薪酬都可以有天淵之別。今年五月,融創中國(01918)太子爺孫喆一矚目登場,以27歲之齡獲委任為公司執董。融創中國主席孫宏斌對愛兒仲相當闊綽,講明愛兒每年有權袋薪金約120萬元人仔及津貼、實物利益等。

「企二代」薪酬大不同

對比下,雙樺控股(01241)喺半個月之前,委任咗同為27歲嘅鄭菲為公司執董兼副總裁嘅待遇,就差天共地嘞。雖然鄭菲貴為主席鄭平膝下千金,但每月董事袍金只得5,000蚊人仔,即全年6萬蚊人仔,副總裁職位酬金就要參考公司業績表現及市況而定。

睇埋南南資源實業(01229),前主席兼執董羅方紅失聯就快兩個月,羅方紅老公兼公司執董王翔飛就搵阿仔王四維任其替代董事,34歲嘅王四維代父上陣,更不會獲得任何報酬。

余絲韻