孖妹S檔案：飽讀投資書 速變股神

學做股債達人話咁易

鍾：投資Blogger、全職投資者 鍾記

Kitty：你有廿幾年做金融工作經驗，由分析員做起，到最後做芬佬，舊年三月仲辭埋工，專心搞Blog同個人投資，真係好羨慕你可以做自由人。

鍾：我同太太都冇返工，已達財務自由，現時資產組合大約平均分三部分，包括收租物業、股票、債券，每月可製造過10萬元嘅被動收入，因我哋唔大使，生活都覺得充裕。股票方面，我會運用股票與現金三七比嘅策略，市好、估值高時，就減持股票，令股票減至最少三成嘅比例；市差、估值平，就增持股票，最多增至七成比例。

10種秘技睇通估值

鍾：債券投資方面，我追求每年3%回報就滿足，唔會搏殺，環球利息上升緊，我會選擇持有短年期嘅直債至到期為止，就算債價波動都唔關我事；股票方面，我就有三寶，有盈富基金（02800）、滙豐控股（00005）、港交所（00388）用嚟長線投資。散戶最啱揀盈富，若每年有7至8%總收益，幫你揀晒股票，計及複式效應，九年可Double本金。

彩兒：你今次新書《選股與估值─價值投資的得勝之道》係講選股同估值，等你教路喇。

鍾：你應該要買我本書睇，哈哈！我簡單說明，揀優質股最好合乎4大條件，要有經濟專利、有護城河、有增長潛力，以及企業管治佳，港交所明顯係一個好例子；若要喺好嘅時機入市，就要識點睇估值，唔同類型企業要用唔同嘅估值方法，我本書入面有教10種方法，若係股友今年最留意嘅科網股，就要用PEG指標（市盈增長率）去睇喇。

管好「人生四桶金」乜都掂

林：理財教練、理財書作家 林昶恆

彩兒：你今年本新書書名係《四桶金富足退休指南》，真係好吸引，我都好想即刻退休！

投資Blogger鍾記表示，散戶最適合揀盈富。

理財教練林昶恆稱，強積金十分有用。

執靚積金 百萬落袋

林：香港人口老化嚴重，而且我又出開理財系列嘅書，所以咪出嚟應應市，你睇吓，政府出年會推終身年金計劃、已推銀色債券，未來有機會搞全民退保添喇，但有好多人仲對退休部署有好多迷思同誤解，所以書入面都有好多解答，亦想讀者了解退休規劃係等於風險管理，雖然強積金有好多負面新聞，但佢其實好有用，一般打工仔若可好好打理佢，估計平均退休可拎番過百萬元，第日可做現金流，唔好睇小。

我本書嘅核心就係要管好「人生四桶金」，分別係應急資金、人身風險儲備、平穩收益組合，同埋長遠進取組合。我知你哋一向醉心投資，就主力講吓後面「兩桶金」，想有平穩收益，就要由工具入手，好多人以為股票派息可以做到，但股票冇保證派息，而且股價有機會下跌添，我哋應該要尋求未來8至10年，可以有每年4%回報嘅產品，當中選擇有債券同派息基金，若資本不足一千萬元，就應揀債券基金，要揀國際品牌基金公司、宏利等，自己信心都大啲。

另要留意，派息基金亦有機會投資低評級債，息率或冇保證，價格會有波動，賣出時有賺息蝕價嘅機會，所以要有長揸嘅心理準備。而長遠進取組合，我建議做好平穩收益組合，用回報去應付日常支出先好搞，可留意環球股票基金，勝在分散風險能力高。

主攻有股息率藍籌

Kitty：我比較有興趣睇吓你個私家倉！

林：我廿年前做過股票經紀，喺九七年金融風暴，試過因用孖展買隻股停牌，搞到輸過百萬元，其後我就踏實咗，我自己「四桶金」組合分布係有10%喺應急資金，平穩收益組合同長遠進取組合各45%，人身風險儲備就另計。依家持有嘅股票，主力係有股息率嘅藍籌股，如內銀股工商銀行（01398）、滙豐控股（00005）、中國移動（00941）；派息基金就揸緊高收益基金、均衡股債基金等。

月入萬元可財務自由？

龔：資深投資者、投資書作家 龔成

Kitty：書？「輸、輸」聲好似唔吉利，但偏偏我愈睇愈賺，真係要叫啲姊妹咪咁迷信。

龔：我睇好多書，出書仲有版稅收入添，我啱啱出第5本書，今次本書叫做《大富翁致富藍圖》，出呢本書係因為我有好多八、九十後朋友，唔知喺現實世界點樣運用資源，其實現實世界就好似玩大富翁咁，但係究竟揸住啲錢應該點用？點解有人只得萬幾蚊人工都可以財務自由？最重要係知道遊戲玩法，加上努力就會有成果。

資深投資者龔成表示，應該以資產追資產，而並非以現金追資產。

龔成啱啱出第5本書，叫做《大富翁致富藍圖》。

靠「真資產」滾大財富

龔：玩法係要識將每月部分薪金以適當途徑進行財富增值，投資喺「真資產」，因單純儲現金，財富未算真正累積，現金唔算係「真資產」；若以坊間炒股票波幅去賺錢，唔算係真正累積財富，我睇法係要買入優質資產長揸，呢啲資產會隨住貨幣系統嘅升值，加上經濟同企業成長，資產自然成長，「真資產」主要投資物業同股票。

彩兒：揸住萬幾蚊人工幾時先上到車？

龔：接受咗咁多年傳統教育，學校冇教過我哋理財知識，所以喺累積資產期間，我哋都要不斷累積投資知識，獲得財務知識先分到資產係優定劣，價格係平定貴，因為有通脹，用現時樓價同九七年樓價比係有問題嘅。我自己打咗十年工，由8,000蚊人工，加到最後離職時係16,000蚊，但當時已有幾百萬元流動資產，有物業，算係財務自由，因為我一路打工一路累積資產項目，好似股票、物業、建立生意、出書收持續嘅版稅等。話明玩大富翁，先求增值，後講現金流，所以應該要有計劃、有步驟，喺啱嘅時間、把握啱嘅機會、啱嘅人生階段一步步做投資，將資產滾大。

兩方法發掘潛力股

龔：年輕打工仔一開始計劃，就應該買入潛力股或增值股，股票入場費低、增值能力高又易入場，但係係講緊長期增值，等企業慢慢成長，追求數以倍計嘅回報；以前車位入場費低，所以可以係第二步，但現時租金回報率跌至只有3至4厘，政府收緊按揭，可能要等吓好時機喇，若然可慢用小量槓桿，入場費其實少於10萬元，算買入咗資產項目，增值後資本多咗，就可投資較大型嘅資產項目，例如物業。用現金嚟追資產，係點都追唔到，應用資產嚟追資產。

Kitty：潛力股同增值股咁易搵咩！

龔：搵增值股，要搵增長較快行業，有時喺財報入面較難睇到佢係咪增值，可用貼近日常生活嘅方法搵，如蘋果公司嘅iPhone，見身邊愈來愈多Friends用，參考朋友取態就可分析產品擴散速度，有助搵潛力股；另一個指標係股本回報率（ROE）等財務指標，我搵優質股，條件係要ROE喺12%以上，皆因我搵咗過去十年有能力升10倍嘅股票，佢哋平均ROE係去到18%，所以12%水平已係潛力股或增值股。

我年初搵出比亞迪電子（00285），佢至今股價累升約兩倍；但有啲太大隻、又成功嘅公司，如騰訊（00700）市盈率達40至50倍，我有保留。下半年可留意手機相關股，但未必揀大隻，怕市場已發現或升咗，科技類公司常見行業洗牌，由大變細，細變大，手遊股走勢波動，但不妨揀喜歡嘅Game開發商，小注博爆升。

彩兒、Kitty

若有料報畀彩兒同Kitty或有嘢問，可電郵money.biz@on.cc