Market Insight：資源類股選擇吸納

油股有反彈無大升

難兄難弟的黑金市場，即使油組成員國延長減產協議九個月，惟睇見國際油價由年初見55美元高位後級級落，53.7美元、52美元及47.3美元的阻力位呈一浪低於一浪。

無他，油價一過50美元，美國頁岩油商又大採特採，等於同油價定咗個天花板。中國在能源市場野心就更大，可燃冰已開始商業探採，長遠而言，油價實在好難惡得出樣，形成石油股有反彈無大升的形態。

中國海關公布上半年鐵礦石進口量升9%至5.39億噸，如無意外，今年破去年10.24億噸創新高已無懸念。中國需求比預期強，刺激由二月開始累積跌幅不菲的鐵礦石價格，近期蠢蠢欲動，可惜相關股份，得隻鐵貨（01029）較有鑊氣，上周五急升12.5%見0.315元。其他鐵礦石股好似恒實礦業（01370）、中國罕王（03788）會唔會有機會跟住開車，今個星期不妨睇實。

市場力量不可對抗

美股上周五再破位，道指見過21,681點歷史新高，港股夜期再升多150點，預示市場對上周已連升五日的港股，今日早市會再下一城。

恒指上周挾穿六月高位26,090點，淡友被挾到無碇企，上周連升五日累積升1,048點，上月恒指高低波幅得533點，是今年以來最窄的一個月，破位要衝幾多，在於淡友打靶投降冚到去乜位至停。

留意到上周恒期及國期未平倉數字並無明顯減少，周五仲有14.3萬張及24.1萬張，斷估仲未挾夠。

睇住大戶對撼，看風駛舵得一注本錢的散戶緊記，唔好同市場力量對抗，盲目清倉走去做熊仔，真係死咗都唔知乜事。

股市太癲 宜步步為營

唔經唔覺「侵侵」上任就夠半年，美墨建牆、本土優先、振興基建的主張有幾多兌現，大家心照不宣。弔詭是，大選後被譽為「特式升市」的美股，並無因為經濟承諾陸續走數而終結，股市繼續照升如儀，證明一切都不過是藉口，股市要瘋狂起上嚟，乜都擋佢唔住。

漠視一切利淡消息

更甚是，過去大半年，股市對聯儲局一舉一動的演繹方式，一樣玩緊「公我贏、字你輸」的遊戲。當就業數據復甦，帶動加息預期升溫，股市睇經濟層面往上炒。近日聯儲局主席倫媽到眾議院作證，對美國能否返到並維持2%的通脹目標，口氣都無之前咁強硬，講明通脹唔達標唔排除改變貨幣政策。

股市唔理三七廿一，因為息口接近見頂而熱炒，總之好消息威力被放大，同時選擇性漠視所有利淡消息，你話依家美股唔係牛市三期都無人信。之不過，升市莫估頂，無人知個市可以癲多幾耐，總之股民步步為營，見唔對路要肯壯士斷臂。

古勝