絲絲講場：企業借錢都要講環保

企業想借錢，銀行都要睇你盤生意究竟環唔環保？梗係啦，今時今日講求綠色嘅世界，如果銀行覺得你盤生意唔能夠符合環保嘅概念，又或者做咗啲有可能Hurt到地球先生嘅嘢時，銀行真係會同你講「等陣，睇睇先」。

話說喺新加坡上市嘅農業及能源產品供應商來寶集團（Noble Group），今年三月就打算發7.5億美元（約58.5億港元）債券融資，滙豐係單Deal嘅聯席簿記行。

環保組織即刻話，懷疑來寶旗下企業，打算剷走巴布亞新畿內亞1.8萬公頃（大約1.8萬個足球場咁大）受保護嘅原生熱帶雨林。來寶就反駁話，巴布亞新畿內亞嗰度啲雨林係再生林，唔係原生嘅喎！

滙豐反應好快，上星期即刻帶頭話叫RSPO（可持續棕櫚油圓桌倡議組織）去查一查吓好喎，仲講到明滙豐會確保遵守RSPO嘅標準。絲絲好想知，單嘢如果咁發展落去，最尾呢筆融資唔知會點呢可。

仲記得兩年之前，中環渣打總行亦畀環保組織踩過場，抗議渣打幫全球最大開採煤礦項目融資會榨乾大堡礁，仲喺總行條樓梯貼滿惡搞貼紙。銀行唔怕煩就假，睇嚟滙豐今次學精咗！

余絲韻