從我於周三喺本欄用到「anything but cash」、「最怕無貨」這一類字眼入文後，我都預咗會畀人challenge，我理解的係，牛市最驚就是見到有人認叻同叫人all in嘛！
之但是我非常清楚，自己於這一浪的分析，以至於買賣，都是建基於對金、股、匯、債市的互動趨勢，經過多方面的驗證，不會錯得去邊。
事實上，於上周六有來撐場的粉絲都聽得出，我講的故事聽起來都似模似樣、都呃到吓人！哈哈！
要於恒指企到「25樓」這個高水平，兼連升六個月之後還叫大家掃貨，確實係幾高風險，下場只得兩個：一係變神，一係變燈囉！永無中間的，中間的機會率咪就係零囉！不過，耶倫於地球的另一邊好似幾支持我喎，她於隔夜的聽證會上表明，今年縮表乃係勢在必行。
同時，市場轉而相信，聯儲局要縮表但又不傷害市場的話，下半年加息可說是無望了。美匯又跌，人仔又走高，加速了游資往新興市場走。
恒指自周初至今，以每日升舊幾、兩舊的姿態直闖26,100點的阻力位。其實，後市相對是變得易玩的，點解呢？恒指於先前衝到上26,100點止步之後震盪調整，就算明知後市是升呀，由於下方的黃金比率支持於24,600點，一買一坐，隨時有1,500點的downside，買貨好不安心。目前不同喎，26,100點企穩了，於現價26,300點買入的話，downside得兩、三百點，但upside就有2,200點喎，1比10，計到數吖！
到了昨日，大市差啲就見到千億元的成交！你話喇，有乜可能食唔到港交所（00388）突破205元嗰一棍先？
所以，我於昨日一瞓醒就對群組內的粉絲講：「掃啦！205元樓下掃港交所，博佢破205元，牛市不二之選！」如今大我、小我都破位喇，後市實有力衝。港交所一郁，中資同本地券商又郁喇，仲唔係牛市？繼續享受升浪啦，有事話你知！
富昌金融研究部總監 譚朗蔚（作者為註冊持牌人士，客戶持有港交所）