Market Insight：憧憬佳績 光國抵玩

倫媽講話中最出人意表係，在談及通脹數據偏低的問題，即使堅持只屬暫時性質，但都不忘戴定頭盔，話專注令美國回到2%的通脹目標，假如未能成功會調整貨幣政策。言下之意，如果通脹掉頭向下，聯儲局唔排除會掉頭減息，特別提到目前聯邦基金利率毋須再調升太多，已足以達到中性利率水平。股市解讀係，認為是預告美國未來加息幅度有限。

恒指隨時要抖抖氣

隔晚倫媽講話之後，道指率先創新高，港股的第四日升市，幾乎一步到位。恒指昨日裂口開26,340點，同最終收市價26,346點僅差6點，同周三比較則升302點。過去三日都唔多郁的息口敏感地產股，昨日終於開波，新世界發展（00017）升3.3%，信和置業（00083）升2.2%、新鴻基地產（00016）升2.1%、恒隆地產（00101）則升1.9%。

藍籌股中，得啱啱被罰款200萬元的港鐵公司（00066）見紅，微跌0.4%收報44.5元。全國金融工作會議召開前夕，重磅中資股強勢持續，使藍籌整體升勢全面，不過，恒指過去四日累積升幅唔細，仲留低兩個上升裂口，有機會抖抖氣，補補裂口再上。技術上，恒指上次高位26,090點已經由阻力變支持，無貨可以睇位上車。

轉型成功 大行唱好

兩隻盈喜股昨日走勢悅目，中國光大國際（00257）及西王特鋼（01266）分別升7.6%及4.1%，收報9.99元及1.26元。周三收市後，光國預告中期盈利多賺四成，而西王特鋼則指半年溢利上升八至九成，後者業績衰完轉好番，反而光國吸引到古勝注意。

光國主力從事近年高速增長的環保行業，在內地經營垃圾發電、污水處理、光伏及沼氣發電等新能源項目，食正減排環保條水，轉型之後，業績一直保持理想增長，一六年多賺33.5%至27.8億元，如果將半年預告增幅套落一七年全年條數，最樂觀賺39億元，市盈率唔夠11倍。

當然，上半年業績標青主要受惠於項目增多，以及成本削減幅度比預期大，下半年未必可照單全收。昨日花旗出報告唱好，估計一七年全年賺34億元，有22.3%增長，市盈率只得12.2倍，PEG（估值/增長幅度）得0.54倍。有咁高增長的國策扶持股，股價喺10元附近幾抵玩，短期先睇上半年高位11元，花旗訂12.35元目標價，計落15倍市盈率，講真真係唔過分。

珠寶股有復甦故事

衰咗一排的零售股，看來已屆靜極思動之時。昨日見三隻本地珠寶股，周大福（01929）、六福集團（00590）以及周生生（00116）統統成交異動下做好，最強的六福見過29.5元的兩年半新高。其實，六福同周大福的業績，在過去大半年都開始有見底迹象。

無疑內地雷厲風行地打老虎，反貪大氣候底下，豪客掃貨經已成為絕唱，但經過一輪適應期，加上租金由高峰大為滑落，好處逐漸反應。復甦故事好炒，加上估值唔貴，可以睇番好些少。三股之中，四月開始周生生股價在17至20.5元之間載浮載沉，唔嫌炒味無咁濃，但勝在業務四平八穩兼估值唔貴，一於小注怡情。

古勝