絲絲講場:永隆義工教長者理財

唔少銀行都會成立義工兵團,永隆銀行一班義工上周六去咗觀塘真光苑地區長者中心,向老友記講解點樣精明理財,兼教埋預防電話騙案埋身方法。

除咗同長者互動外,活動亦安排義工一嘗成為高齡長者滋味。大家輪流穿上特製嘅體驗裝備,包括模擬老花、黃斑症等狀況嘅老化眼鏡,仲有模擬駝背、關節退化嘅負重及約束裝備等,之後接受連串挑戰,例如執麻將、過馬路等。

相信經過今次義工活動後,永隆義工日後服務老友記時,會更多一份關懷同耐性。查實呢類體驗,唔止義工,人人都應該要試吓。

余絲韻