絲絲講場：鴻騰掛牌 Twins壓場

講緊嘅係鴻騰主席、總裁兼首席執行官盧松青同執行董事盧伯卿呢對雙胞胎，無論造型、身形、髮型，甚至個笑容都幾乎一模一樣，如果唔係細佬盧伯卿副眼鏡多咗個深色框，恐怕大家真係分唔出兩位盧生！

雙胞胎絲絲其實都見唔少，但可以喺上市公司擔任第一同第二把交椅，仲要有個「朵」叫做鴻海左右手嘅，真係算罕見！

唔知係咪有鴻騰Twins壓場加持帶挈，公司股價都見升，開市報2.87元，收報3.15元，較招股價2.7元高出16.6%；投資者每手帳賺450元。

TOMO上市贈軟枕

場上同樣令絲絲不禁要望多兩眼嘅，可以話係同時掛牌嘅新加坡乘用車配件商TOMO Holdings（08463）送畀聯交所份紀念品，係一個車用軟枕，若非用個透明陳列盒咁鄭重咁裝住，絲絲差啲唔知原來係份紀念品！至於股價？Well，佢哋上市價0.73元，收報0.63元，跌13.6%。

講番鴻騰Twins，唔知佢哋公司啲同事會否好似絲絲一樣，靠個眼鏡分大細盧生嘅呢？若佢哋第時換新眼鏡，咁點算？

余絲韻