Market Insight:潤啤買貨作兩手準備

兩地債券通啟動,雖然先北後南,但點都算係好消息。港交所(00388)生意唔憂做,但見昨日上過205.2元又回頭,收市僅升1元報202.8元,始終見唔番兩年前的豪放升勢。畢竟大家都學會要冷靜看待呢類「兩地通」的消息,生意長做長有,慢火煎魚,細水長流更好!

細價股風暴餘波未了,市傳證監會到券商調查細價股持倉,似要棒打某些莊家系股份。股仔當災,見到中國集成(01027)昨日股價大部分時間都係一仙淨估。不過,咪以為一仙淨估股價冇得再低可以博,現時該股股價仲有7.5億元市值,若然嚟緊中績業績再差,呢個市值水平都難支持,所以話咪亂撈底,擔櫈仔睇熱鬧就好了。

鞍鋼隨時後來居上

上周異動的鋼鐵股,本周初無懼淡靜市再接再厲,其中鞍鋼股份(00347)上過6元,收報5.92元,升1.72%;馬鞍山鋼鐵(00323)一度高見3.4元,收報3.31元,升6%。重慶鋼鐵(01053)亦追落後,收報1.22元,升6%。當然,論人氣,馬鋼仍是首選;但論走勢,馬鋼已率先破咗今年高位,相對而言,鞍鋼現價與今年二月高位6.5元仲有一截,可以博過後來居上。至於重鋼,都係略嫌人氣唔夠,風險大啲,要揀都係揀鞍鋼或馬鋼。

上周提及搵質優醫藥股可選華潤醫藥(03320),昨股價再創52周新高,已上車者不妨安坐順風車,揸中線要博兩三成利潤不成問題。

繼續奉行唔大唔買策略,就睇吓啤酒股一哥華潤啤酒(00291),因進入夏季又係啤酒銷售旺季。去年十一月公司已完成收購華潤啤酒49%股權,加上積極優化產品結構及品質,提升中高檔及罐裝啤酒比例,料今年銷售及毛利率都會有較好的表現。

此外,早前傳出同業青島啤酒(00168)的海外股東擬出售股權,惟至今未有進展,見青啤股價維持在35元水平徘徊,會否在下半年有消息,潤啤又會否加入競爭,最終手落誰家,都值得關注。

再睇股價走勢,潤啤股價仍處近兩年的上升通道內,最近在19至20元水平徘徊,昨收報19.82元,升0.61%。兩手準備,若有消息刺激突破通道頂部阻力22元關,料可引發重估並上移目標價;但若再次遇阻回落,則宜待回落至18元或以下再分注作中線收集。

內房起哄宜見好收

昨日又見內房股起動,中指院日前公布今年上半年內房銷售排名,頭3位分別為碧桂園(02007)、萬科(02202)及中國恒大(03333),三股昨日升幅介乎2.8至4.5%,不過風頭完全被二三線股份蓋過,多隻股份都創52周新高,包括綠城中國(03900)、融創中國(01918)、龍湖地產(00960),以及近半個月狂飆的眾安房產(00672)及中國金茂(00817)等。

板塊當炒,不過多隻股份近期升幅已多,回吐壓力較大,投資者跟炒內房要見好就收。

古勝